काभ्रे,
सौर्य एयरलाइन्सको जहाज दुर्घटनामा मृत्यु भएका १८ जनाको शवको पोष्टमार्टम जारी रहेको छ । त्रिवि शिक्षण अस्पतालमा गएरातिदेखि नै शवको पोष्टमार्टम सुरु गरिएको हो । सबैको पोष्टमार्टम सकेपछि मात्रै परिवार र आफन्तलाई शव जिम्मा लगाइने पोष्टमार्टममा संलग्न चिकित्सकले बताएका छन् । त्रिवि शिक्षण अस्पतालको फरेन्सिक विभाग प्रमुख डा. गोपाल चौधरीकाअनुसार एउटा शव पोष्टमार्टम गर्न कम्तिमा चार घण्टा लाग्नेछ । जसकाकारण १८ वटा शव पोष्टमार्टम गर्न भोलिसम्म लाग्ने छ । त्यपछि मात्रै आफन्तलाई शव बुझाउन सकिने उहाँले बताउनुभयो ।
सौर्य एयरलाइन्सको जहाज दुर्घटनामा मृत्यु भएकाको शोकमा आज राष्ट्रिय झण्डा आधा झुकाइने भएको छ । बुधबार बसेको मन्त्रिपरिषद बैठकले त्रिभुवन विमानस्थलमा भएको सौर्य एयरलाइन्स जहाज दुर्घटनामा मृत्यु भएकाको शोकमा आज राष्ट्रिय झण्डा आधा झुकाउने निर्णय गरेको थियो । सरकारले उक्त जहाज दुर्घटनाको बारेमा नेपाल नागरिक उड्डयन प्राधिकरणका पूर्वमहानिर्देशक रतीशचन्द्रलाल सुमनको संयोजकत्वमा छानबिन समिति गठन समेत गरेको छ ।
