काभे,
बैदेशिक रोजगारीमा पठाइदिन्छु भन्दै युवाहरुबाट रकम लिएर सर्लाहीमा एक दम्पत्ति फरार भएका छन् । युवाहरुबाट एक करोड भन्दा धेरै रकम उठाएका सर्लाही लालबन्दी नगरपालिका–८ का पदमबहादुर गोले र उनकी श्रीमती जुली श्रेष्ठ फरार भएका हुन्् । गोले दम्पती मिलेर बिभिन्न ठाउँका ६५ जनाभन्दा धेरै युवासँग रकम असुली गरेको पीडितहरुकोे दाबी छ । गोले दम्पत्तिले एक करोड १७ लाख रुपैयाँभन्दा धेरै रकम ठगी गरेर फरार भएको पीडित युवाहरुले बताएका छन् ।
विभिन्न देशमा राम्रो रोजगारीमा पठाइदिने भन्दै एकै व्यक्तिसँग नौ लाख रुपैयाभन्दा धेरै रकम लिएको पीडितमध्येका एकल मिलनकुमार चौधरीले गुनासो गर्नुभएको छ । गोले दम्पतीले विभिन्न देशमा रोजगारीका लागि राम्रो अवसर आएकाले त्यसका लागि आवश्यक कागजातसमेत तयारी गर्नु भनेको उनीहरुको भनाइ छ । पैसा जम्मा गरे लगत्तै भिषा आउँछ भनेपछि आफूहरुले ऋण खोजेर मोटो रकम बुझाएको पीडितहरुले बातएका छन् । प्रहरीमा उजुरी दिएको लामो समय भइसक्दा पनि गोले दम्पतीलाई प्रहरीले पक्राउ गर्न नसकेको पीडितले गुनासो गरेका छन् ।
