काभ्रे,
श्रीकृष्ण जन्माष्टमीको अवसरमा आज काभ्रे जिल्लाको बनेपा नगरपालिकामा बृहत् कन्यापूजा गरिँदैछ। आज मध्याह्न शुरु गरिने पूजामा बनेपा भित्रका मात्रै करिब सात हजार कन्या पुजिने सनातन कन्या–पूजा प्रबन्ध समितिले जनाएको छ। १२२ वर्षअघि बनेपा शहरमा शुरु गरिएको ‘कन्यापूजा’ लाई हरेक वर्ष यही दिन पुजिँदै आएको छ। कन्या–पूजा बनेपा नगरको पुरानो बजारमा वि.सं. १९५९ देखि वर्षैपिच्छे कृष्ण जन्माष्टमीका दिन गर्दै आइएको हो ।
आज बनेपाको भोलाखाँ टोलबाट लायकु दरबार तथा पुरानो बजार हुँदै चारदोबाटोसम्म सडकको दायाँबायाँ पेटीमा कन्याहरु लस्करै बस्छन् । कन्यालाई पुज्न काठमाडौं, भक्तपुर र ललितपुर तथा छिमेकी जिल्लाबाट पनि भक्तजन आउने गरेका छन्। पूजामा सामेल प्रत्येक कन्याको टाउकोमा शुद्ध तोरीको तेल दलेर रातो टीका लगाइदिने प्रचलन रहेको छ ।
रजस्वला नभएका अर्थात बेल–विवाह नगरिएका कन्यालाई पुज्ने व्यक्ति निरोगी भई ‘मनले चिताएको’ पुग्ने पुरानो मान्यता छ । यही मान्यताका साथ पछिल्ला वर्षदेखि काभ्रेपको नाला, पनौती, साँगा, दोलालघाट लगायत विभिन्न बजार तथा बस्तीमा कन्यालाई श्रीकृष्ण जन्माष्टमीको दिन पुज्ने गरिएको हो । बनेपाका ‘भोछिभोया’ खलक चण्डेश्वरीका सन्तति मानिने भएकाले कुनै जाति या वर्गका आधारमा भेदभाव नराखी उपस्थित कन्याको पूजा गरिन्छ ।
