काभ्रे,
काभ्रेपलाञ्चोक जिल्लाको रोशी गाउँपालिकामा–२ मा अवस्थित तीनधारे झरना यति बेला गर्मी छल्नका लागि आन्तरिक पर्यटकको पहिलो रोजाइमा पर्ने गरेको छ । पछिल्लो समयमा बाहुबली झरनाको नाममा चिनिन थालेकोे तीनधारे झरनामा आन्तरिक पर्यटकको घुँईचो लाग्ने गरेको छ । प्रकृतिको मनोरम दृश्य हेर्नका लागि यहाँ दैनिक दुई सयभन्दा बढी मानिस पुग्ने गरेका छन् भने सार्वजनिक बिदाको दिनमा यो सङ्ख्ख्या झण्डै दोब्बरले बढ्ने गरेको स्थानीयहरु बताउदछन् ।
रोशी गाउँपालिका वडा नम्बर २ काफलडाँडामा रहेको यो तीनधारे झरना विभिन्न सामाजिक सञ्जालमा समेत चर्चिते छ । सोही कारण अहिले झरना हेर्न आउने, टिकटक बनाउने र रमाउन आउने आन्तरिक पर्यटकको रोजाइमा परेको छ । गर्मी बढेसँगै सो झरनामा गर्मी छल्न पर्यटकहरुको भिड बढ्ने गरेको छ। पर्यटकको घुइँचो बढ्दै गएपछि स्थानीय सरकारले पर्यटकका लागि विश्रामस्थल, रेलिङ, शौचालय र कपडा फेर्ने ठाउँलगायतका संरचनाहरुको निर्माण गरेको छ ।
