काभ्रे,
असोज ९ गतेबाट बनेपा महोत्सव–२०८१ (पाँचौ संस्करण) हुने भएको छ । बनेपा ब्वाइज क्लब (बि.बि.सी) को आयोजनामा बनेपा महोत्सव २०८१ (पाँचौ संस्करण) को आयोजना गरीएको हो । ‘हाम्रो अभियान खेलको शान, संस्कृति र समृद्धि बनेपाको पहिचान’ भन्ने नाराका साथ क्लबले बनेपा महोत्सव २०८१ (पाँचौ संस्करण) आयोजना गरेको हो । बनेपामा आन्तरिक पर्यटनलाई आकर्षित गर्ने, विभिन्न कृषि, धार्मिक, सांस्कृतिक, औद्योगिक, हस्तकला प्रबद्र्धन, खेलकूद विकास गर्ने उद्देश्यले महोत्सव आयोजना गरीएको बताईएको छ । बनेपा नगरपालिका वडा नम्बर ७ स्थित उग्रेश्वर महादेव मन्दिर परिसरमा असोज २४ गतेसम्म महोत्सव सञ्चालन हुने छ । उक्त मेलामा कृषि, घरेलु सामग्री लगायतका करिब एक सय भन्दा धेरै प्रदर्शनी कक्ष रहनेछन् ।
मेलामा बालबालिकाको मनोरञ्जनका लागि बाल उद्यानको व्यवस्थापन गरी मेला अवधिभर प्रत्येक दिन राष्ट्रिय कलाकारको सहभागिता गराई साँस्कृतिका कार्यक्रमसमेत गरिने जनाइएको छ । मेलामा खेल प्रतिस्पर्धा, धिमे बाजा प्रतियोगिता, खुल्ला नृत्य तथा गायन, मार्सल आर्ट तथा ऐतिहासिक बनेपा सम्बन्धी विभिन्न प्रतियोगिता सञ्चालन गरिनेछ ।
