काभ्रे,
काभ्रे जिल्लाको रोशी गाउँपालिकाले शुभकामना आदानप्रदान तथा झण्डोत्तलन गरेर संविधान दिवस तथा राष्ट्रिय दिवस २०८१ मनाएको छ । आज जिसस काभ्रेका उपप्रमुख रिमबहादुर तामाङको प्रमुख आतिथ्यता एवम् रोशी गाउँपालिकाका अध्यक्ष दिनेश लामाको सभापतित्वमा संविधान दिवस २०८१ को अवसरमा शुभकामना आदानप्रदान तथा झण्डोत्तलन गरीएको हो । गाउँपालिकाको प्रशासनिक भवनको प्राङ्गणमा प्रमुख अतिथि तामाङ, अध्यक्ष लामा, प्रमुख प्रशासकीय अधिकृत शिव प्रसाद भन्तना, प्रहरी निरिक्षक कृष्ण गिरि, वडाध्यक्ष अशोक गौतम, पालिकाका कर्मचारीहरु लगायतले नेपालको झण्डोत्तलन गरेका हुन् ।
संविधान दिवस २०८१ को शुभकामना दिनुहुदै प्रमुख अतिथी रिमबहादुर तामाङले शाहीदहरुको बलिदानीले प्राप्त संविधानको पूर्ण कार्यान्वयन गर्नुपर्ने बताउनुभयो । साथै आवश्यकता र कमजोरीहरुलाइ पहिचाहन गरि संविधान संशोधन गर्नुपर्ने उहाँको भनाई छ ।
रोशी गाउँपालिकाका अध्यक्ष दिनेश लामाले जनताको बलिदानीबाट प्राप्त संविधानलाई कार्यान्वयन गर्नुपर्नेमा जोड दिनुभएको छ । स्थानीय जनाता र स्थानीय सरकारलाई संविधानमै मजबुत बनाउदै लानुपर्ने उहाँको भनाइ छ । संविधान संशोधनको कुराहरू उठिरहेको बताउनुहुदै अध्यक्ष लामाले संविधान संशोधन गर्दै गर्दा स्थानीय तहलाई अझ मजबुत बनाउने र अझ अधिकार सम्पन्न बनाउदै लानुपर्ने बताउनुभयो । आगामी दिनमा स्थानीय तहलाइ बलियो बनाउनको लागि र संघीयतालाइ प्रभावकारी ढङ्गबाट कार्यान्वयन गर्नको लागि संविधान पूर्णरूपमा कार्यान्वयन गर्नुपर्ने अध्यक्ष लामाले बताउनुभयो ।
गाउँपालिकाका प्रमुख प्रशासकीय अधिकृत शिव प्रसाद भन्तनाले २००७ साल भन्दा अगाडि रैतिका रुपमा रहेका जनाता नै संविधानले आजको समाज बनाएको बताउनुभयो । त्यसैगरी रोशी–७ का वडाध्यक्ष अशोक गौतमले राजनीतिक दल र जनताको अथक प्रयासले बनेको संविधानलाई रक्षा गर्दै पूर्ण कार्यान्वयन गर्नुपर्ने धारणा ब्यक्त गर्नुभयो । कार्यक्रममा इलाका प्रहरी कार्यालय मंगलटारका प्रमुख तथा प्रहरी निरिक्षक कृष्ण गिरि, जनप्रतिनिधिहरु, पालिकाका शाखा प्रमुखहरू तथा कर्मचारीहरुको उपस्थिति रहेको थियो ।
