काभ्रे,
संविधान दिवस २०८१ को अवसरमा रोशी ९ रजबासमा रहेको विन्ध्यवासिनी माविले दीप प्रज्वलन गर्नुका साथै शुभकामना आदानप्रदान गरेको छ । विद्यालयका प्रधानाध्यापक श्री तिलक राज न्युरेको अध्यक्षतामा उक्त विशेष कार्यक्रम सम्पन्न भएको हो। कार्यक्रममा विद्यालयका शिक्षक तथा विद्यार्थीहरूबाट बृहत र्याली निकालिएको थियो ।
विद्यालयदेखि रजबासको विभिन्न गाउँ टोलमा र्याली गरी पुनः विद्यालयमा फर्किएर विविध सांस्कृतिक कार्यक्रम सञ्चालन गरेर संविधान दिवस २०८१ लाई हर्षोल्लासको साथ मनाइएको बिद्यालयका शिक्षक साधुराम रानामगरले जानकारी दिनुभयो । कार्यक्रमको अवसरमा विद्यार्थीहरूबाट विभिन्न प्रकारका सांस्कृतिक कला प्रदर्शन गरीनुका साथै शिक्षकहरूले पनि संविधानसम्बन्धी विभिन्न लेख रचना तथा कविताहरू वाचन गरेका थिए ।
नेपाली जनताको सातदशक लामो सङ्घर्ष, बलिदान र जनआन्दोलनको उपलब्धिका रूपमा गठन भएको संविधानसभाबाट २०७२ असोज ३ मा सङ्घीय लोकतान्त्रिक गणतन्त्र नेपालको संविधान जारी भएको थियो । सरकारले संविधान जारी भएको उक्त दिनलाई प्रत्येक वर्ष संविधान दिवस तथा राष्ट्रिय दिवसका रूपमा मनाउँदै आएको छ । दिवसका अवसरमा दिपावली मनाउन र राष्ट्रिय झण्डा फहराउन सरकारले सम्पुर्ण नेपालीहरुमा आह्वान समेत गरेको छ ।
