काभ्रे,रेडियो रोशी,
रोशी गाउँपालिका वडा नं. ५ स्थित सिसाखानी दोकर्पा गढीमा ॐ बुद्ध शान्ति छ्योर्तेन गुम्बाको शिलान्यास गरीएको छ । आज प्रतिनिधि सभा सदस्य तथा पूर्व उर्जा राज्यमन्त्री सूर्यमान दोङ लालध्वजको प्रमुख आतिथ्यता तथा रोशी गाउँपालिकाका उपाध्यक्ष मिम बहादुर वाईबा (ज्वाला) को बिशिस्ट आतिथ्यतामा गुम्बाको शिलान्यास गरीएको हो । कार्यक्रममा लामा गुरु जगतमान लामाले स्वागत मन्तब्य राख्नुभएको थियो । त्यसैगरी गुम्बा निर्माण समितिका सदस्य बिर्ख बहादुर लामा, वरीस्ठ लामा गुरु सुब्बा सिं लामाले शुभकामना मन्तब्य राख्नुभएको थियो ।
कार्यक्रमलाई सम्बोधन गर्नुहुदै कार्यक्रमका प्रमुख अतिथि सूर्यमान दोङ लालध्वजले गुम्बा सांस्कृतिक धरोहरको प्रतीक रहेको बताउनुभयो । आज शिलान्यास भएको यस गुम्बाको निर्माण कार्य छिट्टै सम्पन्न होस भन्ने कामना गर्नुहुदै उपस्थित सम्पुर्णमा शुभकामना ब्यक्त गर्नुभयो । अनावश्यक तथा फजुल खर्चलाई नियन्त्रण गरेर यस गुम्बा निर्माणमा लगानी गर्न पनि उहाँले सम्पुर्णमा अनुरोध गर्नुभयो ।
धार्मिक र सांस्कृतिक पहिचानलाई संरक्षण गर्ने मात्र नभई, युवा पुस्तालाई परम्परा र संस्कृतिसँग जोड्न यो पबित्र कार्यले महत्वपुर्ण भूमिका खेल्ने उहाँको भनाई छ । यस पवित्र कार्यमा सबैको सहभागिता र सहयोगको आवस्यकता रहेको बताउनुभयो । पैसा अभावको कारण गुम्बा निर्माण कार्य रोकिन नहुने बताउनुहुदै यस पबित्र कार्यमा आफुले सकेको सहयोग गर्ने बताउनुभयो ।
त्यसैगरी रोशी गाउँपालिकाका उपाध्यक्ष मिम बहादुर वाईबा (ज्वाला) ले यस वडाको धार्मिक, सांस्कृतिक तथा सामाजिक विकासको लागि यो गुम्बाको निर्माण महत्त्वपूर्ण रहने बताउनुभयो । यस पबित्र कार्यले युवा पुस्तालाई हाम्रो धर्म र संस्कृतिप्रति जागरुक बनाउनुका साथै उनीहरूलाई सही मार्गनिर्देशन गर्नमा पनि मद्दत पुर्याउने बताउनुभयो । आज शिलान्यास भएको यस गुम्बा निर्माणको कार्य समयमै सम्पन्न होस् भन्ने कामना गर्नुभएको छ । यसका लागि आवश्यक सहयोग गर्न सदैव तत्पर रहेको उहाँका भनाई छ ।
कान्छा मान लामाको सभाध्यक्षतामा सम्पन्न भएका कार्यक्रममा गुम्बा निर्माण समितिका पदाधिकारीहरु, लामा गुरुहरु, समाजसेवी, लगायत स्थानीयहरुको सहभागिता रहेको थियो ।
