काभ्रे,
जल तथा मौसम विज्ञान विभागले काभ्रे र सिन्धुपाल्चोक सहित ५६ जिल्लामा भारी वर्षा हुने प्रक्षेपण गरेको छ । जल तथा मौसम विज्ञान विभागले विशेष बुलेटि जारी गरेर बिहीबारदेखि आइतबारसम्म ५६ जिल्लामा भारी वर्षा हुने प्रक्षेपण गरेको छ। बंगालको खाडी र अरब सागरतिरबाट उच्च जलवाष्पयुक्त वायु नेपाल सोझिएकाले भारी वर्षा प्रक्षेपण गरिएको हो । महाशाखाले सात प्रदेशका ५६ जिल्लालाई रेडअलर्टमा राखेको छ।
महाशाखाले गण्डकी र लुम्बिनी प्रदेशका थोरै स्थानहरू तथा कोशी, बागमती, मधेस, कर्णाली र सुदूरपश्चिम प्रदेशका एक–दुई स्थानमा अति भारी वर्षाको पनि सम्भावना रहेको महाशाखाले जनाएको छ। विभागले चार दिनसम्म देशभर विभिन्न ठाउँमा हल्कादेखि अति वर्षासम्म भएर त्यसले ५६ जिल्लामा जनधनको क्षति हुनसक्ने भन्दै सजग गराएको छ ।
दिउँसोभन्दा राति ठूलो पानी पर्ने देखिएकाले पहिरो गइरहने भिरालो जमिन आसपास, डुबान भइरहने होचा स्थानमा र नदी तटीय क्षेत्रका नागरिकलाई विशेष सावधानी अपनाउनुपर्नेछ । महाशाखाको अनुसार आज राति बागमती, कोशी, मधेश, गण्डकी र लुम्बिनी प्रदेशका एकदुई स्थानमा निकै ठूलो पानी पर्ने सम्भावना रहेको छ । देशका तराई भूभागका केही स्थानहरूमा हावाहुरी पनि चल्नेछ ।
रेडअलर्ट जारी भएका ५६ जिल्लाहरुः
कोशीः झापा, मोरङ, सुनसरी, धनकुटा, तेह्रथुम, खोटाङ, ओखलढुंगा, उदयपुर, भोजपुर, इलाम र पाँचथर
मधेशः सिराहा, सप्तरी र पर्सा
बागमतीः मकवानपुर, चितवन, धादिङ, नुवाकोट, रसुवा, काठमाडौं, भक्तपुर, ललितपुर, काभ्रे, सिन्धुपाल्चोक, सिन्धुली र रामेछाप
गण्डकीः म्याग्दी, बागलुङ, तनहुँ, स्याङ्जा, नवलपरासी पूर्व, कास्की, पर्वत, लमजुङ, गोरखा र मनाङ
लुम्बिनीः रुकुम पूर्व, रोल्पा, गुल्मी, प्युठान, अर्घाखाँची, पाल्पा, दाङ, कपिलवस्तु, रुपन्देही, नवलपरासी पश्चिम, बाँके र बर्दिया
कर्णालीः जाजरकोट, रुकुम पश्चिम, दैलेख, सुर्खेत र सल्यान
सुदूरपश्चिमः कैलाली, डोटी र अछाम
