काभ्रे,
काभ्रे जिल्लाको नमोबुद्ध नगरपालिका ७ भकुन्डेबेशीमा रहेको मेथिनकोट अस्पतालले शल्यक्रिया विधिबाट प्रसूति सेवा दिन सुरु गरेको छ । पहिलो पटक यहि असोज १३ गतेबाट सुरु भएको यस सेवाबाट नमोबुद्ध नगरपालिका ७ की एक गर्ववती महिलाको शल्यक्रिया सफलता पूर्वक सम्पन्न भएको थियो । डा.मनोहर श्रेष्ठको नेतृत्वमा मेडिकल सुपरिटेन्डेन्ट तथा बाल रोग विशेषज्ञ अच्युत पौडेल, एनेस्थेसिया असिस्टेन्ट कुशल अधिकारी, ओटी नर्स पिंगल श्रेष्ठ, शर्मिला प्रजापति लगायतको टोलीले पहिलो पटक असोज १३ मा गर्ववती महिलाको शल्यक्रिया सफलता पूर्वक सम्पन्न गरेका थिए । विभिन्न पालिकाहरुबाट थप ४ जनाले यो सेवा लिएका छन् ।
अस्पताललमा आपतकालिन शल्यक्रिया प्रसूति सेवाको सुरुवातसँगै धुलिखेल ल्याउनु पर्ने बिरामीहरुको साथ साथै बाटोको कारण हुन सक्ने थप सम्भावित जोखिम पनि कम भएको छ । अस्पतालले सुरु गरेको शल्यक्रिया सेवाका बारेमा बागमती प्रदेश सरकारका स्वास्थ्य मन्त्री किरण थापा मगरले समेत अवलोकन गर्नुभएको थियो । असोज १३ गते सुरु भएको उक्त सेवा निरन्तर सञ्चालन हुने अस्पतालका मेडिकल सुपरिटेन्डेन्ट डा.अच्युत पौडेलले जानकारी दिनुभयो ।
