काभ्रे,
पूर्वी तराईका जिल्लालाई छोटो दूरीमा राजधानी काठमाडौँसँग जोड्ने बिपी राजमार्गमा यातायातको चाप बढ्दै गएको छ । धुलाम्मे सडक, कतै बाटो साँघुरो, खाल्डाखुल्डीले यात्रा कष्टकर बनेको छ । असोजको दोस्रो सातामा अबिरल वर्षासँगै रोशी खोलामा आएको बाढीले भत्काएर क्षतविक्षत पारेको बिपी राजमार्गको नेपालथोक–भकुण्डेबेसी खण्डमा ट्रयाक सडक निर्माणसँगै यातायातको चापले यात्रा कष्टकर बनेको हो ।
सडकखण्डमा यातायातका साधनहरुको चापले जाम हुन थालेपछि सवारी साधनहरु समयमा गन्तव्यमा पुग्न सकेका छैनन । त्यसमा पनि सवारी साधनहरुको चापले यात्रुहरु बाटो नै नदेखिने गरी उडेको धुलो खेप्न बाध्य बनेका छन् । बिपी राजमार्गको भकुण्डे–नेपालथोक खण्डको करिव १३ किलोमिटर सडक पूर्णरुपमा ध्वस्त भएको स्थानमा सिंगल लेनको सडक रोशीको बगरबाट सञ्चालन गरिएको छ ।
डाइभर्सन गरि बनाइएको सडकको अवस्था राम्रो नभएको र केही स्थानमा एकतर्फी भएका कारण सवारी सधान लामो जाममा पर्ने गरेका छन् ।
रोशीको बाढीले कटुन्जे, डाँडागाउदेखि नेपालथोकका दर्जनौं ठाउँमा सडक क्षतिग्रस्त पारेको छ । सडक डिभिजन कार्यालयले रोशी बगरमा अस्थायी ट्रयाक खालेर यातायात सञ्चालन गरेको छ । रोशीको बगरबाट बाटो सञ्चालन गर्दा पानी परेर रोशी बढेको खण्डमा बाटो तत्काल अवरूद्ध हुने अवस्था छ ।
