काभ्रे,
काभ्रे जिल्लाको नमोबुद्ध नगरपालिका, रोशी र तेमाल गाउँपालिकाको अन्तरपालिका बैठक सम्पन्न भएको छ । बुधबार नमोबुद्ध नगरपालिकाको सभाहलमा नगरप्रमुख कुन्साङ लामाको अध्यक्षतामा बैठक सम्पन्न भएको हो । असोज १० देखि १३ गतेसम्म परेको अविरल बर्षापछि आएको बाढी र पहिरोबाट प्रभावित पीडितहरूको पुर्नस्थापन र पुनःर्निमाणको लागि बागमती प्रदेश र संघ सरकारले कुनै ठोस नीति, योजना र कार्यक्रम नआएको उक्त बैठकको निष्कर्श निकालेका छन् । त्यस बिषयमा संघ र प्रदेश सरकारलाई ध्यानाकार्षण गर्ने बैठकले संयुक्त निणर्य गरेको छ । बैठकको निणर्यमा भनेको छ – ‘बाढीपछि काभ्रे जिल्लाका पालिकाहरूलाई संकटग्रस्त पालिका घोषणा गरेर पनि पार गरीसक्दा पनि संघ र प्रदेश सरकारले बाढीपिडितको पुर्नस्थापन र पुनःनिर्माणको कुनै ठोस नीति, योजना र कार्यक्रम ल्याउन नसकेकोमा ध्यानाकार्शन गर्ने निणर्य गरको छौँ ।’
सो बैठकले त्यस्तै ९ बुँदामा निणर्य गरेको छ । बाढीले क्षती पुर्याएको अन्र्तपालिका सञ्चालित योजनाहरू पुनःनिर्माण र मर्मतका लागि संघ र प्रदेश सरकारसँग माग तथा पहल गर्ने निणर्य गरेको रोशी गाउँपालिकाका अध्यक्ष दिनेश लामाले जानकारी दिनुभयो । नमोबुद्ध, रोशी र तेमालका संयुक्त योजनाहरू संयुक्त पहल गरी निर्माण गर्नको लागि बैठकको आयोजना गरेको लामाको भनाई छ । विपी राजमार्गसहित ६ वटा अन्र्तपालिका सडकहरू, दुई वटा पक्की पुल, ९ वटा झोलुंगे पुल र ५ वटा खानेपानी आयोजनाहरू पुनःनिर्माण तथा मर्मतको लागि प्रदेश तथा संघ सरकारलाई संयुक्त पहल गर्ने निणर्य भएको उहाँको भनाई छ ।
नमोबुद्ध नगरपालिकाका नगरप्रमुख कुन्साङ लामाको अध्यक्षतामा बसेको बैठकमा रोशी गाउँपालिकाका अध्यक्ष दिनेश लामा, तेमाल गाउँपालिकाका अध्यक्ष चन्द्र लामा, नमोबुद्धका नगरउपप्रमुख रत्न लामा, रोशीका उपाध्याक्ष मिमबहादुर वाईबा, तेमालका उपाध्यक्ष दलमान थोकर, नमोबुद्ध नगरपालिका वडा न ६ का वडाध्यक्ष टिकाबहादुर केसी, वडा न ३ का रमेश तिवारी, वडा न १० का रामकृष्ण अधिकारी, नमोबुद्ध, रोशी र तेमाल गाउँपालिकाका प्रमुख प्रशासकीय अधिकृत क्रमशः शेषकान्त पौडेल, शिव प्रसाद भन्तना र योगेन्द्र राज गुरुङ, इन्जीनियरहरू उज्ज्वल अर्याल, भुपेन्द्र अधिकारी र डम्बर बटाला लगायतको उपस्थिती रहेका थिए ।– ईपाना नेपाल
