काभ्रे,
युनिभर्सल डेण्टल हस्पिटल, कलंकी काठमाडौको प्रवन्ध निर्देशक राजेन्द्र लामाले गणेश माध्यमिक विद्यालय रोशी १२ काभ्रेपलाञ्चोकमा अध्ययनरत २५२ जना विद्यार्थीहरुलाई न्यानो कपडा (स्वेटर) उपलब्ध गराउनुभएको छ ।
गणेश मा.वि.को ६१ औँ वार्षिक उत्सव तथा अभिभावक भेलाको अवसरमा उक्त कपडा वितरण गरीएको हो । चिसो मौसमको कारण दिनभरी कक्षाकोठामा बसेर अध्ययन गर्न कठिन भईरहेको अवस्थामा स्वेटर पाए पछि विद्यार्थीहरु खुसी भएका छन् ।
गणेश माध्यमिक विद्यालयले प्रबन्ध निर्देशक राजेन्द्र लामालाई अनुरोध गरे पछि लामाले विद्यालयलाई स्वेटर पठाएको हो । गणेश माध्यमिक विद्यालयले शैक्षिक गुणस्तर सुधारको लागि एक अक्षयकोष पनि स्थापना गरेको छ ।
विद्यालयको संस्थापक सदस्य ललितबम रायमाझीको परिवारले एक लाख पाँच हजार रुपैयाँ नगद गत वर्ष नै उपलब्ध गराएर शुरु भएको उक्त अक्षय कोषमा संस्थापक कोषाध्यक्ष बखत सिंह लामाको परिवारले यसै वार्षिक उत्सवको अवसरमा पचपन्न हजार पाँचसय पचपन्न रुपैया नगद उपलब्ध गराएको छ ।
अक्षय कोषमा पूर्व विद्यार्थी एवं नेपाल सरकारको शाखा अधिकृत विजय मुक्तानले पचास हजार र पुर्व विद्यार्थी तथा समाज सेवी विलाम मुक्तानले पच्चिस हजार जम्मा गर्ने बचन दिनुभएको छ ।
एक करोढ बराबरको अक्षयकोष स्थापना गरेर प्राप्त व्याज बाट विद्यार्थीहरुको सिकाई गुणस्तर अभिवृद्धिको क्रियाकलाप सञ्चालन गर्ने उदेश्य रहेको विद्यालय व्यवस्थापन समितिको अध्यक्ष गुणराज मुक्तानले बतउनुभयो । उक्त अक्षय कोषमा सहयोग संकलनको लागि उक्त विद्यालयबाट पास आउट भएका पूर्व विद्यार्थीहरुलाई आव्हान गरेको छ ।
गणेश मा.वि को ६१औं वार्षिक उत्सवको अवसरमा आयोजित अभिभावक भेला तथा अन्तरक्रियामा विद्यालयको समस्याहरुको बारेमा पनि आवाज उठेको थियो । विद्यालायको पढाई क्रमागत रुपमा सुधार हुँदै गएको, कक्षा १२ को परिक्षामा सतप्रतिशत विद्यार्थी उत्तिर्ण भएको र एस ई ई परीक्षामा पनि सन्तोषजनक नतिजा हासिल गरेकोमा अभिभावकहरुले खुसी व्यक्त गरेका थिए ।
विद्यालयमा खानेपानी र शौचालयको राम्रो व्यवस्थापन गर्नुपर्ने आवाज पनि अभिभावकहरुले उठाएका छन् । रोशी गाउँपालिका प्रवक्ता एवं त्यसै वडाको वडा अध्यक्ष बसन्त तामाङले विद्यालयको खानेपानी र शौचालयको समस्या समाधान गर्ने बचन दिनुभएको छ ।
त्यस्तै स्व. पूर्ण सिं स्मृति प्रतिष्ठानद्वारा विद्यालयको आधारभूत तह र माध्यमिक तहका दुई जना उत्कृष्ट विद्यार्थीहरूलाई नगद पुरस्कार उपलब्ध गराएका छन् भने कक्षा गत प्रथम विद्यार्थीहरुलाई शैक्षिक सामग्री पुरस्कार उपलब्ध गरीएको छ ।
यस्तै संस्थापक सदस्य स्व. मेघनाथ मैनालीको स्मृतिमा नाती सुकदेव मैनालीले बिद्यालयको बालक्लबलाई रु. २,५०० रकम सहयोग हस्तान्तरण गरीएको छ ।
विद्यालयको ६१औं वार्षिकोत्सवको अवसरमा आयोजित बिभिन्न खेलकुद प्रतियोगितामा विजेता प्रतियोगीहरुलाई पुरस्कार, मेडल र प्रमाणपत्र वितरण गरीएको थियो । साथै शिक्षक तथा बाल विद्यार्थीहरुले नृत्य प्रस्तुत गरेका थिए । कार्यक्रममा समाजसेवी, बुद्धिजीवी, अभिभावकहरु, शिक्षक एवम् विद्यार्थीहरु साथै बिभिन्न सङ्घ संस्थाका प्रतिनिधिहरुको सहभागिता रहेको थियो ।
कार्यक्रममा कक्षा ९ देखि १२ सम्मको विद्यार्थीहरुलाई मुल विषयमा अतिरिक्त कक्षा सञ्चालन गर्ने र अन्य कक्षाको विद्यार्थीहरुलाई सुधारात्मक कक्षा सञ्चालन गरेको र यसको प्रभाव विद्यार्थीको सिकाईमा देखा परेको प्रधानाध्यापक तीर्थलाल मोक्तानले जानकारी दिनुभयो । आगामी वर्षमा छात्रावासको व्यवस्थापन गरेर आवासीय कक्षा सञ्चालन गर्ने योजना समेत रहेको प्रधानाध्यापक मोक्तानले बताउनुभयो ।
