काभ्रे,
इलाका प्रहरी कार्यालय मंगलटारमा सिसिक्यामेरा र सौर्य ऊर्जा प्रणालीको शुभारम्भ भएको छ । वीपी राजमार्गको निगरानी गर्ने उद्देश्यले नवप्रवद्र्धनात्मक कार्य अन्तर्गत रोशी गाउँपालिकाको आर्थिक सहयोग र ई.प्र.का मंगलटारको अग्रसरतामा अटोमेटिक नम्बरप्लेट रिकग्नाईज ( ANPR ) सिसिक्यामेरा तथा बैकल्पिक उर्जा प्रवद्र्दन केन्द्रको सहयोगमा २८०० वाट क्षमताको सौर्य उर्जा (सोलार) जडान गरिएका होे ।
मंगलबार गाउँपालिकाका अध्यक्ष दिनेश लामाको प्रमुख आतिथ्यतामा तथा जिल्ला प्रहरी कार्यालय काभ्रेका प्रमुख तथा प्रहरी उपरिक्षक बसुन्धरा खड्काको अध्यक्षतामा सिसिक्यामेरा र सौर्य ऊर्जा प्रणालीको शुभारम्भ गरिएको हो ।
वि.पि. राजमार्ग अन्तर्गत हुने सवारी दुर्घटनामा फरारको खोजि, चोरी लगायतको आपराधिक घटनाहरुको न्यूनिकरण, बिपि राजमार्गको प्रयोग गरी हुन सक्ने आपराधिक घटनाहरुलाई निस्तेज पार्नुका साथै समग्र अपराध न्यूनिकरण तथा घटित अपराधको सफल अनुसन्धानको लागि प्रविधिको प्रयोग गर्ने उदेश्यले सिसिक्यामेरा जडान गरिएका होे ।
सिसिक्यामेराको उद्घाटन गर्नुहुदै गाउँपालिका अध्यक्ष लामाले राजमार्गमा हुने अपराधिक क्रियाकलापको निगरानीको लागि क्यामेर जडानको लागि सहयोग गरेको बताउनुभयो । सम्भावना भएसम्म प्रहरी कार्यालयहरु नयाँ प्रविधिसँग जोडीएर अगाडी बढ्नुपर्ने बताउनुहुदै आगामी दिनमा पनि आवश्यक सहयोग र समन्वय गर्दै अगाडी बढ्ने उहाँले बताउनुभयो ।
जिल्ला प्रहरी कार्यालय काभ्रेका प्रमुख बसुन्धरा खड्काले प्रबिधिमैत्री प्रहरी कार्यालय निर्माणमा काभ्रेका पालिकाहरुले असाध्यै सहयोग गरेको भन्नुभयो । नागरिकमैत्री प्रहरी सेवा प्रहरीले मात्र दिन नसकिने बताउनुहुदै उहाँले त्यसका लागि तीनै तहका सरकारको सहयोग चाहिने बताउनुभयो । जडान भएको यस सिसिक्यामेराले राजमार्गमा हुने अपराधिक क्रियाकलापमा न्युनिकरण हुनेमा ढुक्क रहेको उहाँले बताउनुभयो ।
त्यसैगरी ईलाका प्रहरी कार्यालय मंगलटारका प्रमुख तथा प्रहरी निरीक्षक कृष्ण गिरिले विपी राजमार्गमा हुने तस्करी र अपराधिक क्रियाकलाप रोक्नको लागि अटोमेटिक नम्बरप्लेट रिकग्नाईज सिस्टम क्यामेरा जडान गरेको बताउनुभयो । सिसिक्यामेरालाई लोडसेडिङले पनि समस्या नहुने उहाँकोे भनाई छ । लोडसेडिङ भएमा त्यसको व्यवस्थापनको लागि सोलार सिस्टम पनि जडान गरेको गिरीले जानकारी दिनुभयो । साथै उक्त कार्यक्रममा ईलाका प्रहरी कार्यालयमा कार्यरत प्रहरीहरुलाई खेलकुद पोषाक पनि वितरण भएको थियो ।
कार्यक्रममा रोशी गाउँपालिकाका उपाध्यक्ष मिमबहादुर वाइबा ( ज्वाला) , प्रमुख प्रशासकीय अधिकृत शिवप्रसाद भन्तना लगायतको उपस्थिति रहेको थियो ।
