काभ्रे,रेडियो रोशी,
रोशी गाउँपालिका वडा नम्बर ५ चिसापानी स्थित चौतारा सामुदायिक वन उपभोक्ता समितिको तेश्रो वार्षिक साधारण सभा सम्पन्न भएको छ । हिजो (मंगलबार) सिद्धार्थ प्रा.वि को प्राङ्गणमा सव डिभिजन वन कार्यालय कटुञ्जेवेशीका प्रमुख रुपक खत्रीको प्रमुख आतिथ्यतामा सभा सम्पन्न भएको हो ।
कार्यक्रमको सुरुवातमा विद्यालयका शिक्षक भगवान हुमागांई, स्थानीय सोनाम सिं लामा, महिला वडा सदस्य अनिता लामा, स्थानीय सिङ ध्वज लामा लगायतले स्वागत मन्तब्य राखेका थिए ।
कार्यक्रममा बोल्नुहुदै प्रमुख अतिथि सव डिभिजन वन कार्यालय कटुञ्जेका प्रमुख रुपक खत्रीले सामुदायिक वनको अवधारणा बारे प्रस्ट पार्नुभयो । अहिलेको अवस्थासम्म यस सामुदायिक वनबाट आम्दानी लिन नसक्नुको मुख्य कारण उपभोक्ता र समिति सक्रिय हुन नसक्नु रहेको उहाँले बताउनुभयो ।
उपभोक्ता सक्रिय हुँदा समिति पनि स्वत सक्रिय हुने बताउनुहुदै यसबाट राम्रो आयआर्जन गर्न सकिने बताउनुभयो । यहाँ प्रशस्त मात्रामा रहेका जडिबुटिहरु, काठ दाउराहरु निकासी बाट आयआर्जन गरेर कोष खडा गर्न सकिने धारणा राख्नुभयो ।
समितिले गर्ने हरेक निर्णयहरुमा उपभोक्ताहरु सहभागि भई वनको सरक्षणमा एकजुट हुन आग्रह गर्नुहुदै यसका लागि सव डिभिजन वन कार्यालय कटुञ्जवेशी जुनसुकै प्रकारको सहयोग र सहजिकरण गर्न तत्पर रहने बताउनुभयो ।
त्यसैगरी चौतारा सामुदायिक वन उपभोक्ता समितिका अध्यक्ष विर्ष बहादुर लामाले बिगतको प्राकृतिक प्रकोपले आफुहरुले सक्रिय रुपमा कार्यहरु गर्न बाधा पुर्याएको बताउनुभयो । समिति कार्य गर्ने क्रममै रहेको बताउनुहुदै आगामि दिनहरुमा अझै सक्रियता बढाएर आयआर्जन गर्नेतर्फ उन्मुख रहने प्रतिबद्धता जनाउनुभयो । यसका लागि उपभोक्ताहरुको पनि सक्रियता अपरिहार्य रहेको उहाँको भनाई छ ।
यस सामुदायिक वनमा सम्भावना र आम्दानीको श्रोत प्रशस्त मात्रामा रहेको बताउनुहुदै यसलाई पहिचान गर्न र यसतर्फ लाग्ने कार्य भैरहेको उहाँले बताउनुभयो । आयआर्जनको लागि वन क्षेत्रमा होमस्टे निर्माणको कार्य भईरहेको उहाँले बताउनुभयो । साथै आगामि कार्यसमितिको लागि वनलाई सक्रिय रुपमा अघि बढाउन कोहि ईच्छुक रहेमा कार्यसमितिमा जानकारी गराउन उहाँले आग्रह गर्नुभयो।
२०५६ सालमा स्थापना भएको यस सामुदायिक वनको कुल क्षेत्रफल ९५ हेक्टर रहेको छ । २०५६ सालमा स्थापना भएतापनी २०७९ साल देखीमात्रै सक्रिय बनेको छ । समितिको यसअघिको कार्यसमितिले सक्रिय रुपमा कार्य गर्न नसक्दा यस सामुदायिक वन निस्कृय जस्तै अवस्थामा पुगेको बर्तमान अध्यक्ष विर्ष बहादुर लामाले बताउनुभयो ।
साधारण सभामा अध्यक्ष विर्ष बहादुर लामाले समितिको २०८१।८२ को बार्षिक प्रगति प्रतिवेन, आ.ब. २०८२।८३ को योजनाहरु र समितिका कोषध्यक्ष बिमला हुमागांईले प्रस्तुत गर्नुभएको आ.ब. २०८१।८२ को बार्षिक लेखा परिक्षण प्रतिवेन सभाले सर्वम्मत रुपमा पारित गरेको छ ।
चौतारा सामुदायिक वन उपभोक्ता समितिका अध्यक्ष विर्र्ष बहादुर लामाको अध्यक्षतामा सम्पन्न तेश्रो वार्षिक साधारण सभामा समितिका सदस्यहरु, पुर्व कोषध्यक्ष सोरथ सिं जिम्बा, महिला वडा सदस्य अनिता लामा, चौतारा सामुदायिक वन उपभोक्ता समिति पुर्व अध्यक्ष गुन्जमान लामा, बिभिन्न राजनैतिक दलका नेताहरु एवम स्थानीयहरुको उल्लेख्य मात्रामा सहभागिता रहेको थियो ।
