काभ्रेबाट यही साउनमा जारी भएको थियो पक्राउ पुर्जी ।
काभ्रे,
मन्त्री बन्न लागेका दलित अधिकारकर्मी एवम् अभियन्ता खगेन्द्र सुनार विरुद्ध एकपछि अर्को गम्भीर विवाद र काण्ड बाहिरिन थालेपछि शपथ ग्रहण अलमलमा परेको छ । उनीबारे प्रधानमन्त्री सुशीला कार्की पुनर्विचार गर्ने तहमा पुग्नुभएको छ । प्रधानमन्त्रीनिकट उच्च स्रोतका अनुसार उनी गृहमन्त्री ओमप्रकाश अर्याल, ऊर्जामन्त्री कुलमान घिसिङ र अर्थमन्त्री रामेश्वर खनाल लगायतसँग अहिले छलफलमा छिन् ।
गम्भीर प्रश्न उठेपछि अन्य मन्त्रीहरूको शपथ ग्रहण भएपनि सुनारलाई रोक्ने तयारी प्रधानमन्त्रीको कार्यालयले गरेको छ। सुनारलाई प्रधानमन्त्री कार्कीले श्रम मन्त्रालयको जिम्मेवारी दिने तयारी गर्नुभएको थियो ।
आफूलाई दलित अधिकारकर्मीका रूपमा परिचित गराउँदै आएका सुनारविरुद्ध अहिले पनि विभिन्न तीन ठाउँबाट पक्राउ पुर्जी जारी भएको खुलेको छ।
उनीविरुद्ध पछिल्लो पटक यही साउन ५ गते विद्युतीय कारोबार ऐनअन्तर्गत काभ्रे जिल्ला अदालतबाट पक्राउ पुर्जी जारी भएको पाइएको छ। काभ्रेपलाञ्चोक जिल्ला अदालतले विद्युतीय (इलेक्ट्रोनिक) कारोबार ऐनअन्तर्गतको मुद्दामा दलित अधिकारकर्मीसमेत रहेका सुनारविरुद्ध पक्राउ पुर्जी जारी गरेको खुलेको छ।
त्यस्तै उनीविरुद्ध दैलेख जिल्ला अदातलमा २०७९ असोज २६ गते जिल्ला अदालत दैलेखमा बहुविवाहको मुद्दा दायर भएको भेटिएको छ । उनकी जेठी पत्नीले आफू हुँदा हुँदै २७ वर्षीया गीता खत्रीलाई बहुविवाह गरेको भन्दै मुद्दा दायर गरेकी थिइन् ।
अदालतको दायरी शाखाबाट २०८२ साउन ५ गते जारी पत्रअनुसार अधिवक्ता मनिषा गौतमको जाहेरीका आधारमा नेपाल सरकार वादी र खगेन्द्र सुनार प्रतिवादी रहने गरी पनि मुद्दा दर्ता भएको थियो ।
