काभ्रे,रेडियो रोशी,
काभ्रे जिल्लाको नमोबुद्ध नगरपालिकामा हेपाटाइटिस अर्थात जण्डिस सङ्क्रमण फैलिएको छ । नगरपालिकाको वडा नम्बर २, ३, ४ र ६ का बालबालिकाहरुमा संक्रमण देखिएको हो । लक्षण देखिएर मेथिनकोट अस्पतालमा चेकजाच गराउन आएका मध्ये १८ जनामा जण्डिस सङ्क्रमण देखिएको मेथिनकोट अस्पतालका मेडिकल सुपरिटेन्डेन्ट डा. त्रिभुवनचन्द्र झाले जानकारी दिनुभयो ।२३ गते मङ्गलबार ज्वरो आउने, वाकवाक लाग्ने माथिल्लो पेट दुख्ने लगायतका लक्षण भएका बिरामीहरू अस्पतालमा चेकजाच गराउन आएका र नमुना सङ्कलन गरी परीक्षण गर्दा हेपाटाइटिस सङ्क्रमण पुष्टि भएको उहाँले बताउनुभयो ।
दाप्चा बाट बोरीङ गरेर ल्याईएको खानेपानी र पानीपुरी, तथा दुसीत खानेकुराबाट सङ्क्रमण भएको हुनसक्ने उहाँको भनाई छ । चेकजाच गराउन आएका बिरामीहरुसँग बुझ्दा उनीहरुले दाप्चा बाट बोरीङ गरेर ल्याईएको खानेपानी गनाउने, धमिलो जस्तो देखिने गरेको बताएको मेथिनकोट अस्पतालका मेडिकल सुपरिटेन्डेन्ट डा. त्रिभुवनचन्द्र झाले जानकारी भन्नुभयो । हेपाटाइटिस ए हो वा ई हो भन्ने यकिन परीक्षणपछि मात्रै हुने उहाँको भनाई छ ।
सङ्क्रमण फैलिएको जानकारी पाएपछि संघीय सरकारको स्वास्थ्य मन्त्रालय, प्रदेश स्वास्थ्य मन्त्रालयका प्रतिनिधि, जनस्वास्थ्य कार्यालय का प्रमुख रागिश्री कक्षपति श्रेष्ठ, नगरप्रमुख कुनसाङ लामा लगायतले अस्पतालको टोलीसँग छलफल गरेको थियो। सङ्क्रमण थप फैलिन नदिन सचेतना अपनाउन उहाँले सम्पुर्णमा आग्रह गर्नुभएको छ । साथै खानेपानी उमालेर मात्र पिउन, खानेकुरामा सरसफाईमा ध्यान दिन उहाँले अनुरोध गर्नुभएको छ ।
