काभ्रे,
काभ्रे जिल्लाको रोशी गाउँपालिका वडा नम्बर ७ का वडा अध्यक्ष अशोककुमार गौतम र कबाड व्यवसायी मन्टुकुमार पासवानलाई पुर्पक्षका लागि थुनामा पठाउने आदेश भएको छ । रोशी खोलाको क्षतिग्रस्त पुलका पाटपुर्जा बिक्री गर्न खोजिएको घटनामा पक्राउ परेका वडा अध्यक्ष गौतम र कबाड व्यवसायी मन्टुकुमारलाई पुर्पक्षका लागि थुनामा पठाउने आदेश भएको हो ।
जिल्ला अदालत, काभ्रेपलाञ्चोकका न्यायाधीश मातृकाप्रसाद आचार्यको इजलासले बिहीबार उनीहरुलाई पुर्पक्षका लागि थुनामा पठाउने आदेश दिएको जिल्ला अदालतका स्रेस्तेदार कर्णबहादुर राईले जानकारी दिनुभयो ।
वडाध्यक्ष गौतमसहित टिपरचालक मानबहादुर तामाङ र रमेश तामाङ तथा कबाडी संकलकहरू मन्टुकुमार र जितेन्द्र पासवानलाई प्रहरीले गत १२ जेठमा पक्राउ गरेको थियो। चालकहरूलाई भने सरकारी वकिल कार्यालयले तारेखमा छाडेको थियो । कवाडी व्यवसायीका कर्मचारी जितेन्द्र पासवानसँग २० हजार रुपैयाँ धरौटी माग गरिएकोे छ ।
अनुसन्धानको क्रममा नमोबुद्ध नगरपालिका वडा नम्बर ६ का वडाध्यक्ष टिका केसीको पनि संलग्नता देखिएपछि उनलाई पनि प्रहरीले पक्राउ गर्न अदालतबाट अनुमति लिइसकेको छ। उनी भने फरार रहेका छन् ।
गत असोजको बाढीले सो पुल बगाएको थियो। रोशी र नमोबुद्धको सिमानामा पर्ने सो पुलका पाटपुर्जा बिक्री गर्न दुई वडाका अध्यक्षबिच सहमति भएको थियो। तर, कार्यपालिकाबाट निर्णय नगरी बिक्रिका लागि कबाडी व्यवसायीलाई पत्र दिइएको थियो। बिक्री प्रक्रिया शंकास्पद देखिएपछि घटना प्रहरीसम्म पुगेको हो। रोशी–७ का वडाध्यक्ष गौतम माओवादी केन्द्रबाट निर्वाचित हुन् भने नमोबुद्ध–६ का वडा अध्यक्ष टिका बहादुर के.सी.कांग्रेसबाट निर्वाचित भएका थिए ।
