काभ्रे,
रोशी गाउँपालिकाको गाउँ सभाको १७ औं अधिवेशन सम्पन्न भएको छ । गाउँपालिले आगामी आर्थिक बर्ष २०८२÷८३ को लागि ७२ करोड ४ लाख ३७ हजारको अनुमानित बजेट पेश गरेको छ । अधिवेशनमा गाउँपालिका अध्यक्ष दिनेस लामाले आगामी आर्थिक बर्ष २०८२÷८३ को नीति तथा कार्यक्रम प्रस्तुत गर्नुभएको थियो । उपप्रमुख मिम बहादुर वाईबा (ज्वाला) ले आगामी आर्थिक बर्ष २०८२÷८३ को लागि आय र व्ययको अनुमान प्रस्तुत गर्नुभएको थियो ।
उपाध्यक्ष वाईबाले प्रस्तुत गर्नुभएको बजेटमा आन्तरिक स्रोतबाट एक करोड २६ लाख, स्थानीय राजाश्व बाडफाँडबाट दुई करोड ५० लाख, संघीय राजश्व बाँडफाँडबाट नौ करोड ५० लाख ६० हजार, प्रदेश राजश्व बाँडफाँडबाट तीन करोड ९९ लाख ५६ हजार, संघीय सरकार समानीकरणबाट १० करोड २५ लाख, संघीय सर्शत अनुदानबाट ३२ करोड ५१ लाख, संघीय समपूरक अनुदानबाट ९९ लाख, संघीय बिशेष अनुदानबाट ८९ लाख, प्रदेश समानिकरण अनुदानबाट, एक करोड दुई लाख ५० हजार, प्रदेश सरकारको सशर्त अनुदानबाट दुई करोड ७० लाख २७ हजार, प्रदेश सरकारको समपुरक अनुदानबाट दुई करोड ८५ लाख र प्रदेश विशेष अनुदानबाट ६५ लाख प्रक्षेपण गरेर बजेट प्रस्ताव गर्नुभएको छ ।
गाउँसभामा उपाध्यक्ष वाईबाले आर्थिक बर्ष ०८२÷०८३ बजेट प्रस्तुत गर्नुका साथै, विनियोजन विधेयक ०८२ र आर्थिक विधेयक ०८२, स्थानीय उद्योग दर्ता, सञ्चालन, व्यवस्थापन र नियमन सम्बन्धी विधेयक र जलाधार, वन्यजन्तु, खानी तथा खनिज पदार्थको संरक्षण तथा उपयोगसम्बन्धी विधेयक र न्यायिक समितिको वार्षिक प्रगति प्रतिवेदन प्रस्तुत गर्नुभएको थियो । लेखा समिति संयोजक तथा वडा नम्बर ३ का वडाध्यक्ष धनजीत लामाले बेरुजु फर्छाैटको लागि प्रस्ताव गर्नुभएको थियो ।
गाउँपालिकाको नीति तथा कार्यक्रममा आगामी वर्षदेखि एकल पुरुषलाई भत्ता दिन समेत प्रस्ताव गरिएको छ । सामाजिक विकास नीति तथा कार्यक्रम अन्तर्गत गाउँपालिकाभित्रका ६० वर्ष भन्दामाथिका एकल पुरुषलाई दोहोरो नपर्ने गरी सामाजिक संरक्षण कार्यक्रमा आवद्ध गरिने उल्लेख छ ।
त्यसैगरि सुशासन तथा संस्थागत विकास अन्तर्गत गाउँपालिका मतहतका सरकारी कार्यालयहरूमा आयातित पेयपदार्थ निरुत्साहित गरेर स्थानीय रैथाने पेयपदार्थलाई प्रोत्साहन गरेको छ ।
पूर्वाधार विकास, सामाजिक विकास, आर्थिक विकास, वन वातावरण तथा विपद् व्यवस्थापन र सुशासन तथा संस्थागत विकासका लागि विभिन्न कार्यक्रम प्रस्तुत गरिएको थियो । गाउँसभाको १७औँ अधिवेशनको दोस्रो बैठक आगामी आगामी आइतबार बस्नेछ ।
