काभ्रे,
काभ्रेपलाञ्चोक जिल्लाको चौँरीदेउराली गाउँपालिकाले आजबाट आफ्ना नागरिकको सहजताको लागि काठमाडौंमै सेवा दिने भएको छ । विशेषगरी सामाजिक सुरक्षा भत्ता वितरण एवं परिचयपत्र नवीकरण गर्ने व्यवस्था मिलाएको गाउँपालिकाले जनाएको छ । चौँरीदेउरालीले सार्वजनिक सूचना नै प्रकाशन गरी आजदेखि काठमाडौँको विभिन्न स्थानमा सेवा दिने जनाएको हो ।
तालिकाअनुसार भदौ १ र २ गते वडा नं. १, ८ र ९ का बासिन्दा, भदौ ३ र ४ गते वडा नं. २, ४ र ५ का बासिन्दा र भदौ ५ र ६ गते वडा नं. ३, ६ र ७ का बासिन्दालाई सेवा प्रदान गरिनेछ उल्लेख गरेको छ ।
यसअघि गत साउनमा काभ्रे जिल्लाको तेमाल गाउँपालिकाले काठमाडौँ उपत्यकालगायतका सहरमा बस्ने नागरिकलाई घुम्ती शिविरमार्फत सेवा प्रदान गरेको थियो । गाउँपालिकाले विशेषगरी आफ्ना नागरिक बसेको स्थानमै शिविर सञ्चालन गरी सामाजिक सुरक्षा भत्ता वितरण एवं नवीकरण गरेको हो । एकहप्ते शिविरबाट तेमाल गाउँपालिकाले सामाजिक सुरक्षा भत्ता लिने ५ सय ९१ जना नगरिकलाई सेवा दिइएकोे जनाएको छ ।
यी हुन् नविकरणका चाहिने कागजातः
१. राष्ट्रिय परिचयपत्र नम्बर
२. पासपोर्ट साइजको फोटो २ प्रति
३. सामाजिक सुरक्षा भत्ता परिचयपत्र
४. नागरिकता वा जन्मदर्ता प्रमाणपत्रको प्रतिलिपि
५. एकल महिलाको हकमा पतिको मृत्यु दर्ता प्रमाणपत्र प्रतिलिपि
६. अपाङ्गता परिचयपत्रको प्रतिलिपि
यसबाहेक, नाबालक अपाङ्गता भएका तथा ९० वर्ष माथिका नागरिकका लागि राष्ट्रिय परिचयपत्र अनिवार्य नहुने पनि सूचनामा उल्लेख गरिएको छ।
