काभ्रे,रेडियो रोशी,
काभ्रे जिल्लाको रोशी गाउँपालिका–६, सिपालीमा प्रशस्त मात्रामा काक्रो उत्पादन हुँदै आएको छ । यो क्षेत्रमा अहिले पनि दिन बिराएर बाह्र हजार किलोभन्दा बढी काक्रो उत्पादन भइरहेको छ । भदौ ८ गते मात्रै बाह्र हजार किलो काक्रो उत्पादन भएको र यसबाट यहाँका किसानहरुले करिब ६ लाख आम्दानी गरेको स्थानीय प्रकाश रेग्मीले बताउनुभयो । काक्रो उत्पादनको लागि गाउँपालिकाले बिउ वितरण एवं किसानलाई प्रोत्साहन गर्दै आएको उहाँको भनाई छ ।
यहाँ उत्पादित काक्रो बनेपा र काठमांडौ लगायतका सहरमा बिक्री हुने गरेको छ । गत वर्षहरुमा सिपालीको काक्रो पोखरा र बुटवलजस्ता ठूला सहरसम्म पु¥याएर राम्रो मूल्यमा बिक्री भएको थियो । यसले गर्दा यहाँका किसान उत्साहित थिए ।
तर गत असोज दोस्रो साताको विनाशकारी बाढीले रोशी खोलामा रहेको पक्की पुल बगाएपछि यहाँका किसानहरू समस्यामा परेका छन् । रोशी र नमोबुद्ध नगरपालिकाको सिमानामा रहेको मोटरेबल पुल बगाएपछि सडक सञ्जाल जोखिमपूर्ण बनेको छ। जोखिम मोलेरै भएपनि खोलाको बाटो भएर बिक्रिको लागि अन्त लानुपर्ने बाध्यता रहेको स्थानीय अरुण न्यौपानेले बताउनुभयो ।
सिपालीबाट महाभारत गाउँपालिका जाने प्रवेशद्वार पनि यही भएकाले किसान, व्यवसायी र स्थानीय सबै मर्कामा परेका छन् । उत्पादित खाद्यान्न, नगदेबाली, दुध, अम्रिसो र कफीलगायतका उत्पादनलाई बजारसम्म पु¥याउन समस्या परेको स्थानीयहरुको गुनासो छ । तीनै तहका सरकारले गम्भीर ध्यान दिएर पुल पुननिर्माणको कामलाई प्राथमिकता दिन स्थानीयले माग गरेका छन् ।
