काभ्रे,रेडियो रोशी,
नमोबुद्ध नगरपालिका वडा नं. ७ मा एक अज्ञात समूहले श्रृंखलाबद्ध रूपमा सातवटा घरमा चोरी र चोरीको प्रयास गरेको छ। नागेडाडाका पाँच र रातामाटेका दुई गरी सात घरको ताल्चा फुटाएर चोरले नगद र हतियार लगेका हुन् । नागेडाँडाका स्थानीय शंकर सिग्देल, बिनोद सिग्देल, रबिन्द्र सिग्देल, मधुकर खनाल, केसर खनाल र रातामाटेका अन्य २ घरहरू चोरी भएको हो ।
बिनोद सिग्देलले आज बिहान अन्दाजी ५ बजे आफ्नो घरको ताल्चा फोडेकोे देखेपछि मात्रै घटनाको बारेमा थाहा भएको हो । त्यसपछि खोजी गर्दा गाउँका अन्य घरहरूमा पनि चोरी भएको फेला परेको हो । यी घरहरुमा मान्छे नबस्ने गरेको तर सरसामानहरु भने रहेको बिनोद सिग्देलले जानकारि दिनुभयो । घटनाबारे जानकारी पाए लगतै भकुन्डेबेशी चौकिबाट प्रहरी पुगेका छन् ।
बिनोद सिग्देलको घरबाट १,५०० भारतीय रुपैयाँ र मधुकर सिग्देलको घरबाट नेपाली १,५०० रुपैयाँसहित दुई थान खुकुरी चोरी भएको छ। बिनोद सिग्देलको घरमा रहेका पुराना सिक्काहरू छरपस्ट अवस्थामा फेला परेको छ । पीडित बिनोद सिग्देलका अनुसार चोर छिरेका सबै घरहरूमा उनीहरूले आगो बालेका छन् । बिनोद सिग्देलको घरमा ताल्चा फुटाउन प्रयोग गरिएको एउटा फलामको रड र महिलाको कपडा फेला परेको उँहाले जानकारि दिनुभयो । घटनाबारे प्रहरिले थप अनुसन्धान गरिरहेको छ ।
