काभ्रे,
बागमती प्रदेशका मन्त्री तीर्थ लामाको कार्यशैलीको प्रमुख प्रतिपक्षी दल नेकपा एमाले लगायत दलका सांसदले प्रशंसा गरेका छन् । बागमती प्रदेशका खानेपानी, ऊर्जा तथा सिँचाइ मन्त्री तीर्थ लामाले न्यायपूर्वक बजेट विनियोजन गरेको भन्दै उहाँको प्रशंसा भएको हो । नेपाली कांग्रेस काभ्रेका सभापति रहनुभएका प्रदेश सभा सदस्य लामाले खानेपानी, ऊर्जा तथा सिँचाइ मन्त्रालयको जिम्मेवारी सम्हाल्दै आउनुभएको छ । २०७९ सालमा भएको प्रतिनिधि सभा तथा प्रदेश सभा निर्वाचनमा प्रदेश सभा सदस्यमा निर्वाचित उहाँ २०७० सालको संविधानसभा निर्वाचनमा काभ्रे क्षेत्र नं १ मा काँग्रेसको तर्फबाट निर्वाचित हुनुभएको थियो ।
अघिल्लो सरकारमा कृषि तथा पशुपन्छी विकास मन्त्री रहनुभएका एमालेको तर्फबाट केशवप्रसाद पोखरेलले विपक्षीका योजना मागेरै समेटेको भन्दै प्रशंसा गनुभएको छ । त्यसैगरी, अघिल्लो कार्यकालमा उद्योग, पर्यटन, वन तथा वातावरण समितिको सभापति रहेकी एकीकृत समाजवादीका सांसद रमा आलेमगरले व्यक्तिगत रुपमा समन्वय गरेर बजेट विनियोजन गरेको भन्दै खानेपानी, ऊर्जा तथा सिँचाइ मन्त्री तीर्थ लामा र मन्त्रालयलाई धन्यवाद दिनुभयो । एमाले भक्तपुरकी सांसद सकुन्तला श्रेष्ठले विपक्षीबाट बधाई खाने मन्त्री तीर्थ लामालााई मनैदेखि धन्यवाद दिन चाहेको बताउनुभयो । कांग्रेसबाट निर्वाचित धादिङका मधुकुमार श्रेष्ठ, उर्मिला नेपाल लगायतले बजेट विनियोजन गर्ने मन्त्रीको शैलीको प्रशंसा गरेका थिए ।
सिन्धुलीकी एमाले सांसद सुकुमाया तामाङले अन्य मन्त्रालयबाट आफ्नो निर्वाचन क्षेत्रको लागि बजेट लगभग ‘शून्य’ भएपनि खानेपानी मन्त्री र उहाँको सचिवालयले सोधेरै योजनामा बजेट विनियोजन गरेको भन्दै प्रशंसा गर्नुभयो । दोलखा जिल्लाबाट प्रतिनिधित्व गर्ने राष्ट्रिय प्रजातन्त्र पार्टीकी सांसद मोनिका श्रेष्ठले मन्त्रीहरुमध्ये खानेपानी मन्त्रीले योजना समावेश गरिदिएको भन्दै धन्यवादको पात्र भएको बताउनुभयो ।
मन्त्री लामा कम्युनिस्ट गढ मानिने क्षेत्रमा निर्वाचित हुने काँग्रेसको पहिलो उम्मेदवारको रुपमा रहनुभएको छ । २०६४ सालको निर्वाचनमा काँग्रेसले ७ हजार मत ल्याएको उक्त क्षेत्रमा ७० सालमा उहाँ १२ हजार भन्दा बढी मत ल्याएर विजयी हुनुभएको थियो ।
