काभ्रे,
काभ्रे जिल्लाको मण्डनदेउपुर नगरपालिकाले विद्यालयको नियमित गतिविधि र पठनपाठन सुरु गर्न अनुरोध गरेको छ । हिजो बुधबार नगरप्रमुख टोक बहादुर वाईबाले विज्ञप्ति जाँदै गर्नुहुदै आज ११ बैशाखदेखि नगरपालिकाभित्रका सबै विद्यालयहरुमा पढाइ सुरु गर्न शिक्षक, विद्यालय व्यवस्थापन समिति, अभिभावकहरुलाई अनुरोध गर्नुभएको हो ।
शिक्षा ऐन जारी गर्न माग गर्दै देशभरका सरकारी स्कुलका शिक्षकहरु काठमाडौं केन्द्रित आन्दोलनमा होमिँदा नयाँ शैक्षिक सत्रको पढाइ र अन्य शैक्षिक गतिविधि ठप्प भएको छ । नगरपालिकाले शिक्षकहरुको जायज माग तत्काल पुरा गर्न संघीय सरकारसँग आग्रह समेत गरेको छ ।
विज्ञप्तिमा भनिएको छः
‘मिति २०८१ ÷१२ ÷२० गतेदेखि नेपाल शिक्षक महासंघको आह्वानमा सञ्चालन भई रहेको काठमाडौ केन्द्रित शिक्षकहरुको आन्दोलनको कारण विद्यालयको नियमित शैक्षिक कार्यक्रमहरु प्रभावित भई बालबालिकाको पढ्न पाउने मौलिक हक र अधिकारमा प्रतिकूल प्रभाव परेको छ । आन्दोलन २२ औं दिनसम्म पनि निरन्तर चलिरहनु, सकारात्मक दिशा उन्मुख नदेखिनु चिन्ताको विषय बनेको छ । शिक्षा क्षेत्रको स्थायित्व र विकासको लागि शिक्षकहरुको आत्मसम्मान र मर्यादा कायम राख्दै आफ्नो कार्यस्थलमा फर्कने उचित वातावरण निर्माणका लागि तत्काल समस्या समाधानतर्फ गम्भीर हुन नेपाल सरकारको ध्यानाकर्षण गराउन चाहन्छु ।
ग्रेडवृद्धि परीक्षा, कक्षा १२ को वार्षिक परीक्षा, शैक्षिक सत्र २०८२ को विद्यार्थी भर्ना अभियान, पाठ्यपुस्तक वितरण, शैक्षिक कार्ययोजना निर्माण, शिक्षक तालिम, विषयगत शिक्षक अभिमुखीकरण लगायतका विविध शैक्षिक गतिविधि र पठनपाठन सुचारु नहुँदा बालबालिकाको पढ्ने र व्यवहारमा आएको विचलन प्रति अभिभावक तथा बौद्धिक जगतको चासो प्रत्यक्ष रुपमा स्थानीय सरकारतर्फ परेको छ । स्थानीय सरकार सञ्चालन ऐन, २०७४ ले दिएको अधिकार र स्थानीय सरकारको कर्तव्य, जिम्मेवार जनताको सरकारको हैसियतले हाल उत्पन्न समग्र शिक्षा क्षेत्रको विषयमा मण्डनदेउपुर नगरपालिका गम्भीर र जिम्मेवार छ । जुनसुकै अवस्थामा पनि बालबालिकाको पठनपाठन अवरुद्ध हुनुहुँदैन भन्ने हाम्रो मान्यता हो ।
वर्तमान परिप्रेक्ष्यमा आफ्नो माग र विचार राख्न पाउने अधिकार प्रयोग गर्दै गर्दा पदीय जिम्मेवारी र कर्तव्यतर्फ गम्भीर र संवेदनशील हुँदै बालबालबालिकाले पढ्न पाउने मौलिक हक संरक्षण गर्दै, बालबालिकाको भविष्यप्रति उत्तरदायी भई पठनपाठन र शैक्षिक गतिविधिलाई सुचारु हुने लोकतान्त्रिक विधि र प्रकृया अनुसार आन्दोलनको स्वरुप परिवर्तन गरी मिति २०८२÷ १÷११ गतेदेखि विद्यालयको नियमित गतिविधि र पठनपाठन सुचारु गर्नु÷गराउनु हुन सम्पूर्ण शिक्षक, विद्यालय व्यवस्थापन समिति शिक्षक अभिभावक संघ र अभिभावकहरुलाई अनुरोध गर्दछु ।’
