रोशी सहकर्मी–माघ २,
२०७६,रजवास/

रोशी गाँउपालिका वडा नं ९ रजवासमा मगरहरुको राष्ट्रिय एवम् साँस्कृतिक पर्व माघे संक्रान्ति विशेष कार्यक्रम सम्पन्न भएको छ । नेपाल मगर बौद्ध सेवा समाजद्धारा आयोजित कार्यक्रममा रोशी गाँउपालिकाका अध्यक्ष दल बहादुर लामाको प्रमुख आतिथ्यता रहेको थियो भने नेपाल मगर बौद्ध सेवा समाज रोशी ९ को अध्यक्ष लीलाराज चितौरे मगरको सभापतित्व रहेको थियो ।
कार्यक्रममा बोल्दै गाँउपालिकाका अध्यक्ष लामाले “हामी अथाह संस्कृतिको धनी छौँ, पर्व विशेषमा यस्ता मौलिकता प्रदर्शन भएको देख्दा म अत्यन्त खुसी छु”– लामाले भन्दै “जातजाती विच एक आपसमा सद्भाव साटासाट गर्दै कला र संस्कृतिको जगेर्ना गर्नु हामी सबैको कर्तव्य हो” भने । संविधानले व्यवस्था गरेबमोजिम कला, धर्म र संस्कृतिको निम्ति आफुले निभाउनु पर्ने जिम्मेवारी आफ्नो तर्फबाट निभाउने बाचा गर्दै आगामी दिनहरुमा पनि जातित्वको र रोशी गाउँपालिकाको पहिचान कायम राख्न निरन्तर लागि पर्ने बचन वद्धता व्यक्त गरे । “इतिहासको पानामा राज्यको जर्गेना गर्नका निम्ति हाम्रा पुर्खाहरुले दिएको आहुतिको म सम्मान गर्छु । मगर जाती विना रोशी गाउँपालिका कहिल्यै पूर्ण हुन सक्दैन” । रजवासमा बौद्ध विहार निर्माणका लागी गाँउपालिकाबाट १० लाख बजेट विनियोजन गरी काम भईरहेको र विहारलाई पूर्णता दिन आवश्यक रकम पालिकाबाट विनियोजन गर्ने पनि बताए ।
सोही कार्यक्रममा रोशी गाउँपालिकाका प्रवक्ता तथा वडा नं ६ का वडाअध्यक्ष पदम लामाले रोशी गाउँपालिकाको मौलिक पर्व र जातजातीको धर्म संस्कृतिको निम्ति स्थानीय सरकारले गर्नु पर्ने सहयोगमा कुनै कञ्जुस्याई नगर्ने बताए । “सबै जाती, सबै धर्म र सबै पर्वको आ–आफ्नै विशेषता रहेको छ, यसको संरक्षणका निम्ति सबै व्यक्ति, समुदाय अगाडि बढ्न आवश्यक छ” ।
नेपाल मगर बौद्ध सेवा समाज प्रदेश नं ३ का अध्यक्ष साधुराम मगरले मगर जातजातीको पहिचान समय परिवेश सँगै लोप हुने अवस्थामा रहेको भन्दै चिन्ता व्यक्त गरे । “हामीलाई मगर भाषा नै बोल्न आउँदैन (झोर्ले) शब्दले मात्र मगर जातीको पहिचान समेट्न सक्दैन तसर्थ सिंगो मगर जातीको भाषा, भेषभुषा, रहन, सहन रितिरिवाजको निम्ति सिंगो नेपाली समुदाय नै लागिपर्न आवश्यक छ” ।

Facebook Comments