काभ्रे,
राष्ट्रपति विद्यादेवी भण्डारीले वडादसैँँको आठौँं दिन आज महाअष्टमीका अवसरमा काभ्रेपलाञ्चोकको पाँचखाल नगरपालिका–९ स्थित पलाञ्चोक भगवती मन्दिरको दर्शन गर्नुभएको छ । नेपाली सेनाको हेलिकोप्टरमार्फत बिहान साढे ९ बजे पाँचखाल तालिम केन्द्र पुग्नुभएकी राष्ट्रपति भण्डारी त्यहाँबाट करिब ९ किलोमिटर कार्गेटमार्फत पलाञ्चोक भगवतीस्थान पुग्नुभएको हो । राष्ट्रपति भण्डारी १५ मिनेट भगवतीको पूजा आराधना गरी फर्कनुभएको छ । राष्ट्रपति पलमा नियुक्त हुनुभएपछि उहाँले राष्ट्रप्रमुखको हैसियतमा पाँच पटक पलाञ्चोक भगवतीको दर्शन गर्नुभएको हो ।
पलाञ्चोक भगवतीको मन्दिर आज भन्दा करिब १६ सय ५४ वर्ष पहिले निर्माण भएको मानिन्छ । पलाञ्चोक भगवतीलाई भवगतीहरुको जेठी दिदी पनि भन्ने गरिन्छ । बडादशैंको नवरात्रीमा यस मन्दिरमा हाँस, बोका, राँगा आदिको बली दिने समेत चलन रहेको छ । दशैं बाहेक पलाञ्चोक मन्दिरमा वैशाख पूर्णिमा, माघे संक्रान्ति र जेष्ठ पूर्णिमामा ठूलो मेला लाग्ने गर्छ ।
भण्डारीलाई जिल्ला समन्वय समिति काभ्रेपलाञ्चोकका प्रमुख दीपककुमार गौतम, पाँचखाल नगरपालिकाका उपप्रमुख सूर्यमाया दनुवार, पाँचखाल नगपालिका –९ का वडा अध्यक्ष रामकाजी श्रेष्ठलगायतका जनप्रतिनिधिले स्वागत गरेका थिए ।
