काभ्रे,
जाडो बढेसँगै नवजात शिशुको स्वास्थ्यमा विशेष ध्यान दिन चिकित्सकहरूले आग्रह गरेका छन् । जाडोको बेला नवजात शिशुलाई दिनदिनै ननुहाउन र धेरै बेर घाममा नराख्न चिकित्सकहरूको सुझाव छ । जाडोयाममा नवजात शिशुमा झाडापखाला, रुखाखोकी, कफ जम्ने जस्ता समस्या देखिने भएकाले आमाले विशेष ध्यान दिनुपर्ने वरिष्ठ आयुर्वेद विज्ञ डा.बुद्धिप्रसाद पौडेलले सुझाव दिनुभयो । सरकारले पनि जाडो बढ्दै गएकाले सबैलाई स्वास्थ्यको ख्याल राख्न आग्रह गरेको छ ।
स्वास्थ्य तथा जनसङ्ख्या मन्त्रालयले काठमाडौं उपत्यकासँगै मुलुकभर चिसो बढेको भन्दै सतर्कता अपनाउन आग्रह गरेको हो । दूषित खाना र पानीबाट अधिकांश रोग सर्ने भएकाले खानेकुरामा ध्यान दिनसमेत मन्त्रालयको आग्रह छ ।
