काभ्रे,
काभ्रे जिल्लाको पनौती नगरपालिकामा हुने बृहत काभ्रे खेलकुद खेलकुद महोत्सवको आज उपराष्ट्रपति नन्द बहादुर पुनले उद्घाटन गर्नुभएको छ । जिल्ला समन्वय समिति, काभ्रे र जिल्ला खेलकुद विकास समिति काभ्रेको आयोजनामा जिल्ला स्तरीय बृहत खुलकुद महोत्सवको आज उपराष्ट्रपति पुनले उद्घाटन गर्नुभएको हो । ‘स्वास्थ्यका लागि खेलकुद, राष्ट्रका लागि खेलकुद’ भन्ने मूल नाराका साथ सञ्चालन गरिएको महोत्सवको उद्घाटन समारोहलाई सम्बोधन गर्नुहुँदै उप–राष्ट्रपति पुनले खेलकुद पूर्वाधारहरु अझै अलपत्र हुनुको साथै खेलकुद क्षेत्रमा राष्ट्रको लगानी बृद्धि हुन नसकेको बताउनुभएको छ । उनले ‘खेलकुद क्षेत्रको विकासका लागि खेलकुदको पूर्वाधार विकासमा सबै तहका सरकारले लगानी गर्नुपर्ने विषयमा ध्यानाकर्षण हुन जरुरी भएको बताउनुभएको छ ।
१३ वटा पालिकाको सहभागीता रहने महोत्सवमा एथ्लेटिक्स, भलिबल, कराते, डब्लु टि एफ टेक्वान्डो, कब्बडी, चेस, फुटबल, योगा लगायत १२ वटा विधा खेल सहभागी गराइनेछ । १२ विधामा महिला र पुरुष छुट्टा÷छुट्टै सहभागीता रहने उनले बताउनुभयो । सबै विधाका खेलबाट पहिलो हुनेले ३० हजार, दोस्रोले २० हजार र तेस्रो हुने टिमले १० हजार रुपैंया नगद पुरस्कार पाउनेछन् । कार्यक्रममा पूर्वसञ्चारमन्त्री तथा प्रतिनिधि सभा सदस्य गोकुल प्रसाद बास्कोटा, पूर्व राज्यमन्त्री सूर्यमान दोङ (लालध्वज) प्रदेश सभा सदस्यहरु, स्थानीय तहका प्रमुख, उपप्रमुख लगायतको उपस्थिति रहेको थियो ।
