काभ्रे,
बालबालिकामा इन्टरनेटको पहुँच बढेसँगै अनलाइनमार्फत हुने यौन दुर्व्यवहार बढेको पाइएको छ । फेसबुक, म्यासेन्जर, टिकटक, युट्युब, भाइवर, ह्वाटसअप, इन्स्टाग्राम लगायतका सामाजिक सञ्जाल तथा अनलाइन भिडियो गेममार्फत बाल यौन दुर्व्यवहार हुने गरेको विज्ञहरूले दाबी गर्नुभएको छ । भ्वाइस अफ चिल्ड्रेनका निर्देशक कृष्णकुमार थापाले अनलाइनबाट हुने बाल यौन दुर्व्यवहारमा बालबालिकाको शारीरिक, मानसिक, शैक्षिक, नैतिक, सामाजिक विकास तथा अवस्थामा असर पर्ने गरेको विभिन्न अध्ययनले देखाएको बताउनुभएको छ । सोमबार ललितपुरमा आयोजित अन्तरक्रिया कार्यक्रममा उहाँले केही समयअघि आफूहरूले गरेको अध्ययनले इन्टरनेटको प्रयोगबाट ७५ प्रतिशत बालबालिका यौन हिंसाका सिकार हुने गरेका देखाएको जानकारी दिनुभयो ।
उहाँले भ्वाइस अफ चिल्ड्रेन र बाल यौन शोषण अन्त्यका लागि विश्वव्यापी संस्था (इपिक्याट लक्जम्वर्ग) ले सन् २०१७ मा उपत्यकाका पाँचदेखि १२ वर्ष उमेर समूहका ४५२ बालबालिकामा गरिएको सर्वेक्षणअनुसार ७५ प्रतिशत बालबालिकाले अनलाइनबाट हुने यौन दुर्व्यवहारबाट सुरक्षित हुने उपाय बारे आफूलाई थाहा नभएको बताएको बताउनुभयो । उहाँले बालिका मात्र यौन दुर्व्यवहारका सिकार हुन्छन् भन्ने सामाजिक सोच गलत भएको उल्लेख गर्दै २०५२÷५३ सालमा पहिलो पटक नेपालमा बालकहरू पनि यौन दुर्व्यवहारमा पर्छन् भन्ने कुरा स्थापित गर्न आफूहरू सफल भएको बताउनुभयो । उहाँले पछिल्लो समय बालिकालाई जस्तै बालक पनि यौन हिंसाका सिकार बन्ने गरेकोले अभिभावकलाई यसतर्फ सचेत रहन आग्रह गर्नुभयो ।
