काभ्रे,
नेपाली कांग्रेस केन्द्रीय सदस्यमा काभ्रे जिल्लाका शिवप्रसाद हुमागाई सहित ८ जना मनोनित भएका छन् । कांग्रेसका सभापति शेरबहादुर देउवाले कांग्रेस विधानको धारा २१ को उपधारा १० बमोजिम आज ८ जनालाई केन्द्रीय समितिमा मनोनित गर्नुभएको हो ।
मनोनित हँुनेहरुमा काभ्रेका शिवप्रसाद हुमागाई, गुल्मीका डा. चन्द्र भण्डारी, अर्घाखाँचीका मानबहादुर विश्वकर्मा, पर्वतका अर्जुनप्रसाद जोशी , बागलुङका किरणराज शर्मा पौडेल, रुपन्देहीका भरतकुमार शाह, कास्कीका शारदा पौडेल र पर्साका अनिलकुमार रुंगटा रहेका छन् ।
सभापति देउवाले मनोनित गरेका केन्द्रीय सदस्यमा चन्द्र भण्डारी, हुमागाई र शारदा पौडेल बाहेक अन्य संस्थापन पक्षका हुन् । भण्डारी १४ औं महाधिवेशनमा उपसभापतिमा पराजित हुँनुभएको थियो । त्यस्तै विश्वकर्माले सहमहामन्त्रीमा पराजित हुँनुभएको थियो । जोशी, हुमागाईं यस अघि पनि केन्द्रीय सदस्य थिए । किरणराज शर्मा पौडेल यसअघि आमन्त्रित केन्द्रीय सदस्य हुँनुहुन्थ्यो । रुपन्देही ५ बाट गत निर्वाचनमा पराजित शाह त्यसअघि लेखा समितिको सभापति थिए । रुंगटा उद्योगपति हुनुहुन्छ ।
