काभ्रे,
पूर्वसांसद एवं नागरिक उन्मुक्ति पार्टीका संस्थापक रेशम चौधरीको कैद मिनाहा गर्ने सरकारको निर्णय विरुद्ध परेको मुद्दामा सर्वोच्च अदालतमा आजदेखि सुनुवाइ हुँदैछ । रेशमको कैद माफी मिनाहा दिने निर्णय गलत रहेको दाबी गर्दै परेको रिट निवेदनमा आजदेखि सर्वोच्च अदालतमा अन्तिम सुनुवाइ हुन लागेको हो । १५ जेठमा गणतन्त्र दिवसको अवसर पारेर मन्त्रिपरिषद्को सिफारिसमा राष्ट्रपति रामचन्द्र पौडेलले रेशम चौधरीको जन्मकैदको सजाय माफीमिनाहा गरेका थिए ।
टिकापुर घटनामा मारिएका तत्कालिन प्रहरी निरीक्षक केशव बोहराको परिवारले सरकारको उक्त निर्णयविरुद्ध सर्वोच्चमा रिट दायर गरेको थियो । रिटमा राष्ट्रपति कार्यालय, मन्त्रिपरिषद्, गृह मन्त्रालय र रेशम चौधरीलाई विपक्षी बनाइएको छ । माफी मिनाहापछि सार्वजनिक पूर्णपाठमा अपराधको राजनीतिकरण गरी मुद्दा फिर्ता लिने प्रयास गर्नु र उन्मुक्ति दिनु गलत हुने उल्लेख छ ।
