रोशी गाउँपालिकाको ८ औँ स्थापना दिवसः ४ जना कर्मचारी पुरस्कृत

रोशी गाउँपालिकाले हिजो (आईतबार) आफ्नो ८ औँ स्थापना दिवस मनाएको छ । गाउँपालिकाको ८ औँ स्थापना दिवसको अवसरमा उत्कृष्ट रोशी सेवा पुरस्कार र रोशी सेवा पुरस्कारबाट चारजना कर्मचारी पुरस्कृत भएका छन् । हिजो (आईतबार) गाउँपालिकाको सभाहलमा एक कार्यक्रमका बिच कर्मचारीहरुले गरेका कार्यको सुचक को आधारमा गाउँपालिकाले चारजना कर्मचारीहरुलाई पुरस्कृत गरेको हो ।
पुरस्कृत हुँनेहरुमा गाउँपालिकाका प्रमुख प्रशासकीय अधिकृत रामबहादुर तामाङ रहनुभएको छ । उँहा उत्कृष्ट रोशी सेवा पुरस्कारबाट पुरस्कृत हुँनुभएको हो । तामाङ नगद २५ हजारसहित सम्मानपत्र, मेडल, दोसल्ला, माला र खादाले सम्मानित हुँनुभएको छ । त्यसैगरी गाउँपालिकाका जिन्सी शाखा प्रमुख जयप्रसाद गजुरेल, लेखा शाखाका कम्प्युटर अप्रेटर पेमा नाम्गेल लामा र वडा नं. ११ का वडासचिव मानवीर लामा रोशी सेवा पुरस्कारबाट पुरस्कृत भएका छन् । रोशी सेवाबाट पुरस्कृत हुने तीनैजनालाई नगद १० हजारसहित सम्मानपत्र, मेडल, दोसल्ला, माला र खादाले सम्मान गरिएको छ।
कार्यक्रममा गाउँपालिका अध्यक्ष दिनेश लामाले जनताको सेवाप्रवाहमा कर्मचारीले उत्कृष्ट कार्यसम्पादन गरेको बताउनुभयो । कर्मचारीहरुलाई प्रोत्साहन गर्न पालिकाले पहिलोपल्ट उत्कृष्ट कर्मचारी पुरस्कृत गरीएको उँहाको भनाई छ । जनप्रतिनिधिको योजना र कर्मचारीको मिहिनेतले गाउँपालिका उत्कृष्ट हुँदै गएको उँहाको भनाइ छ । यसअघि आर्थिक वर्ष ०७९÷८० को कार्यसम्पादन मूल्यांकनमा काभ्रेका १३ स्थानीय तहहरूमध्ये रोशी गाउँपालिका उत्कृष्ट भईरहेको छ । राष्ट्रिय प्राकृतिक स्रोत तथा वित्त आयोगले बुधबार सार्वजनिक गरेको प्रारम्भिक नतिजाअनुसार ४८.३९ अंक प्राप्त गरी रोशी काभ्रेकै उत्कृष्ट पालिका बनेको थियो ।
त्यसैगरी गाउँपालिका उपाध्यक्ष मिमबहादुर वाइबाले सहिदहरूको बलिदानीबाट संघीयताको स्थापना भएको र तीन तहको सरकार बनेको बताउनुभयो । गाउँपालिका स्थापना भएपछि जनताको विकासमा सहयोग पुगेको बताउँदै जनप्रतिनिधिको योजना र भिजन पूरा गर्न कर्मचारीको सहयोग चाहिने उँहाको भनाइ छ । प्रमुख प्रशासकीय अधिकृत तामाङले जनप्रतिनिधिको सपना साकार गर्न कर्मचारी दत्तचित्त भएर लागेको बताउनुभयो । कार्यक्रममा गाउँपालिका प्रवक्ता तथा वडा नं. १२ का वडाध्यक्ष वसन्तकुमार लामा, वडा नं. ७ का वडाध्यक्ष अशोक गौतमलगायतले उत्कृष्ट काम गर्नेलाई पुरस्कृत र गलत काम गर्नेलाई दण्डित गर्ने अभ्यासको सुरुवात भएको बताएका छन् । कार्यक्रममा गाउँपालिकाका विभिन्न वडाका वडाध्यक्ष तथा जनप्रतिनिधि र कर्मचारीको उपस्थिति थियो।