काभ्रे,
काभ्रे जिल्लाको चौंरीदेउराली गाउँपालिका वडा नं ३ मा शहिद गेट र जनमुक्ति सेनाका कमाण्डर स्व. भवु तामाङ (क. सोम) को शालिक उद्घाटन गरीएको छ । तत्कालीन नेकपा (माओवादी) ले सञ्चालन गरेको जनयुद्धको क्रममा सहिद भएकाहरुको संझनामा सो गेट र शहिद स्व. भवु तामाङ (क. सोम) को शालिक निर्माण गरीएको थियो ।
हिजो प्रतिनिधि सभा सदस्य तथा पूर्व उर्जा राज्यमन्त्री सूर्यमान दोङ (लालध्वज) र नेकपा (माओवादी केन्द्र) केन्द्रीय सदस्य, बागमती प्रदेश संसद मा. रत्न प्रसाद ढकालले एक समारोहका बीच उद्घाटन गरेका हुन् । जनयुद्धको क्रममा २०६० साल साउन ३२ गतेका दिन दोरोम्बा हत्यकाण्डमा सोही वडाका भवु तामाङ (क.सोम तामाङ) सहित २१ जना माओवादी नेता कार्यकर्ताहरुको सामूहिक हत्या भएको थियो ।
गाउँपालिकाको दुई आर्थिक वर्ष २०७९÷०८० र २०८०÷०८१ मा विनियोजित १४ लाख बजेटबाट सहिद गेट र सहिदको सालिक निर्माण भएको वडा अध्यक्ष चित्रप्रसाद चौंलागाईंले जानकारी दिनुभयो ।
कार्यक्रममा प्रमुख अतिथि दोङले सहिद गेट र सहिदको सालिक निर्माण भएपछि सहिदहरुको सम्मान मात्र नभई सहिदहरुले देखाएको बाटोमा निरन्तर लाग्ने प्रतिबद्धता समेत बताउनुभयो ।
त्यसैगरी विशेष अतिथि वागमती प्रदेश सभा सदस्य तथा पूर्व युवा तथा खेलकुद मन्त्री रत्न प्रसाद ढकालले चौंरीदेउराली गाउँपालिकाबाट जनयुद्धको क्रममा दर्जनौ सहिदहरु जन्माएको बताउँदै सहिदले देखाएको बाटोमा आफूहरु निरन्तर रुपमा लाग्ने प्रतिबद्धता जाहेर गर्नुभयो ।
देशलाई आमूल परिवर्तन गर्न ज्यान दिने सहिदहरुको सम्झनामा सहिद गेट, सहिद पार्क र सहिदहरुको सालिक निर्माण गरिएको गाउँपालिका अध्यक्ष रेणुका चौलागाईंले बताउनुभयो ।
प्रतिनिधि सभा सदस्य तथा पूर्व उर्जा राज्यमन्त्री सूर्यमान दोङ (लालध्वज) को प्रमुख आतिथ्यतामा भएको कार्यक्रममा वडाअध्यक्षहरु तथा माओवादी नेता तथा कार्यकर्ताहरु एवं विभिन्न विशिष्ट ब्यक्तित्वहरु लगायतको उपस्थिति रहेको थियो ।
