काभ्रे,
बाढी र सुक्खा पहिरो कारण पटक पटक अबरुद्ध हुँदै आएको बिपी राजमार्ग आजबाट पुनः सञ्चालनमा आउने भएको छ । नयाँ ट्र्याक खुलाएर केही दिन अघिदेखि साना सवारीसाधन चल्न दिए पनि ठूला सवारीसाधन रोक लगाइएकोमा आजबाट ठूला गाडीहरू समेत चल्ने भएका छन् । बाढी पहिरोका कारण क्षतिग्रस्त राजमार्गमा बनाइएको नयाँ ट्रयाकमा आज मंगलबारदेखि ठूला सवारीसाधन चलाउन दिने सडक डिभिजन भक्तपुरले जनाएको छ ।
गत असोज १०, ११ र १२ गते परेको अविरल वर्षापछिको बाढी पहिरोका कारण काभ्रेतर्फ भकुण्डेबेंसीदेखि वर्षेखोला खण्डका विभिन्न स्थानमा बगाएको स्थानमा वैकल्पिक ट्रयाक निर्माण गरिएपछि राजमार्ग आजबाट पुनः सञ्चालनमा आउन लागेको सडक डिभिजन कार्यालय भक्तपुरले जनाएको छ ।
राजमार्ग अन्तर्गत चौकीडाँडा र माम्ती खोला नजिकको डाइर्भसन हिजो साँझसम्म सुधार गरेपश्चात सो राजमार्गमा यातायात सञ्चालनका लागि अनुमति प्राप्त सवारीसाधन सावधानीपूर्वक सञ्चालन गर्ने तयारी गरेको कार्यालयले जनाएको छ ।
राजमार्ग सञ्चालनमा ल्याईएपनि उक्त खण्डमा सुख्खा पहिरो झर्ने सम्भावना भने अझै रहेको छ । तसर्थ यस सडकमा रातको समयमा यात्रा नगर्न कार्यालयले सूचनामार्फत अनुरोध गरेको छ ।
