काभ्रे,
शिक्षकको आन्दोलन लम्बिँदा विद्यार्थीहरूको भविष्य अन्योलमा परेको भन्दै सांसदहरूले सरकारको ध्यानाकर्षण गराएका छन् । आज सोमबार प्रतिनिधिसभामा आकस्मिक र शून्य समयमा बोल्दै सांसदहरूले शिक्षकको आन्दोलन लम्बिँदा विद्यार्थीहरूको भविष्य अन्योलमा परेको भन्दै सरकारको ध्यानाकर्षण गराएका हुन् ।
शिक्षक आन्दोलनको माग सम्बोधन गर्नतर्फ सरकार अग्रसर हुनुपर्ने उनीहरूको आग्रह छ । साथै शिक्षकको माग सम्बोधन र शिक्षा ऐन निर्माणको विषयमा शिक्षामन्त्रीले सदनलाई जानकारी गराउनुपर्ने उनीहरूको भनाई छ ।
कांग्रेसका सांसद दिलेन्द्रप्रसाद बडूले लोकतान्त्रिक सरकारले आन्दोलनरत पक्षमाथि दमन नभएर उनीहरूको माग सम्बोधनमा ख्याल गर्नुपर्ने बताउनुभयो ।
त्यसैगरी नेकपा एमालेका सांसद सूर्य थापाले संयमित भएर आन्दोलन गर्न शिक्षकहरूलाई आग्रह गर्नुभयो । शिक्षकसँग विभिन्न सहमति गरेर कार्यान्वयन नगर्ने प्रवृत्तिले अहिलेको समस्या निम्तिएको भनेर सरकारको ध्यानाकर्षण गराउनुभएको छ ।
शिक्षकमाथि दमन भएको भन्दै राप्रपा सांसद रोशन कार्कीले प्रतिनिधिसभामा आकस्मिक र शून्य समयमा बोल्नुहुदै विरोध गर्नुभएको छ ।
माओवादी सांसद देवेन्द्र दाहालले शिक्षकलाई सम्मान गर्नुपर्नेमा सरकारले दमन गरिरहेको बताउनुहुदै सरकारको ध्यानाकर्षण गराउनुभएको छ ।
पूर्वशिक्षा, विज्ञान तथा प्रविधिमन्त्री समेत रहनुभएको राष्ट्रिय स्वतन्त्र पार्टी (रास्वपा) की सांसद सुमना श्रेष्ठले शिक्षक आन्दोलनमा दमन भएको भन्दै सरकारको ध्यानाकर्षण गरिन् ।
