काभ्रे,
रोशी गाउँपालिका–११, भीमखोरीका ६३ परिवारले एक घर, एक खानेपानीको धारा पाएका छन् । बागमती प्रदेश खानेपानी ऊर्जा तथा जलस्रोत मन्त्रालयको आर्थिक सहयोगमा सम्पन्न खानेपानी आयोजनाअन्तर्गत भीमखोरीवासीले आँगनमै खानेपानीको सुविधा पाएका हुन् ।
भीमखोरी खानेपानी उपभोक्ता समितिको आयोजनामा खानेपानी, ऊर्जा तथा जलस्रोतमन्त्री कृष्णकुमार तामाङ र रोशी गाउँपालिका अध्यक्ष दिनेश लामाले संयुक्त रूपमा खानेपानी आयोजनाको उद्घाटन गरेका हुन् ।
आयोजना हस्तान्तरण तथा धारा उद्घाटन गर्दै मन्त्री तामाङले तीन तहको सरकारले आपसमा सहकार्य र समन्वय गरेर विकास निर्माण गर्नुपर्ने बताउनुभयो । आमनागरिक पनि जिम्मेवार भएर विकास निर्माणमा लागे दिगो विकास हुने उहाँको भनाइ छ ।
रोशी गाउँपालिका अध्यक्ष दिनेश लामाले नागरिकको सेवाको लागि सधैँ तत्पर रहेको बताउनुभयो । बाढी र पहिरोको पीडाबाट पालिका बिस्तारै उठ्दै गरेको जानकारी दिँदै उनले स्थानीयको जनजीविकामा प्रत्यक्ष जोडिने योजनाहरूलाई प्रथमिकतामा राखेर गाउँपालिका अगाडि बढेको बताउनुभयो ।
खानेपानी तथा सरसफाइ डिभिजन नम्बर ३ सिन्धुपाल्चोकका डिभिजन प्रमुख सृष्टि ख्वालपालका अनुसार बागमती प्रदेश सरकारबाट ८४ लाख ६१ हजार २५९ र जनश्रमदानबाट पाँच लाख ६२ हजार ६६२ गरी जम्मा ९० लाख २३ हजार ९२१ लागतमा आयोजना सम्पन्न भएको हो। जसमा एक सरकारी कार्यालयसहित ६३ घरधुरीमा एक घर, एक धारा निर्माण भएको छ। पाँच हजार ६५० मिटर टाढाबाट ल्याएको खानेपानी आयोजनाबाट ३७२ जना स्थानीय लाभान्वित भएका छन्।
उपभोक्ता समितिका अध्यक्ष लक्ष्मीध्वज लामाको सभापतित्वमा भएको उक्त कार्यक्रममा रोशी–११ का वडाध्यक्ष लालकुमार पाख्रिन, रोशी–१० का पूर्ववडाध्यक्ष दूतराज तामाङ, समाजसेवी शंखबुद्ध लामा र रोशी–११ का पूर्ववडाध्यक्ष मिलन मिप्चनलगायतले आयोजना सम्पन्न हुनु भनेको पुण्यको काम भएको बताए।
