काभ्रे,
यसवर्षको बडादशैँको सार्वजनिक बिदा आजबाट सकिएको छ । फुलपातीको दिन असोज २४ गतेबाट शुरु भएको पर्व विदा आजबाट सकिएर कार्यालय खुल्ने भएका हुन् । यस्तै नीजि क्षेत्रका धेरैजसो उद्योग प्रतिष्ठान र कलकारखाना पनि आजबाट खुल्ने नेपाल उद्योग वाणिज्य महासंघले जनाएको छ । दशैँको टीका जमरा लगाउने क्रम भने आज पनि जारी नै छ ।
विजयादशमीको दिनबाट शुरु भएको टीका जमरा लगाएर आशिर्वाद थाप्ने क्रम आश्विन शुक्लपक्ष त्रयोदशीका दिन आज पनि चलिरहेको हो । यो क्रम कोजाग्रत पूर्णिमाका दिनसम्म चल्ने परम्परा छ ।
आज सरकारी तथा सार्वजनिक कार्यालय खुल्ने भएकाले काठमाण्डौ उपत्यकासहित देशैभरका शहरमा विस्तारै चहलपहल बढन् थालेको छ । दशैँमा लगभग १३ लाख जना काठमाण्डौबाट बाहिरिएपछि चहलपहल कम बनेको काठमाण्डौँमा भिडभाड बढ्न थालेको छ ।
