काभ्रे,
काभ्रे जिल्लाको रोशी गाउँपालिकाले नेपालीहरुको महान चाड दशैको समयमा पनि निरन्तर स्वास्थ्य सेवा दिने भएको छ ।
अविरल बर्षापछिको बाढी पहिरोले जनधनको साथै भौतिक संरचनामा बढी क्षति पुगेको रोशीमा खानेपानी लगायतबाट महामारीजन्य रोग फैलन नदिन पालिका भित्रका १४ सरकारी स्वास्थ्य संस्थाले दशैंको समयमा पनि निरन्तर सेवा दिने भएका हुन ।
रोशी गाउँपालिका विपद् व्यवस्थापन समितिको बैठकले सम्भावित महामारी रोकथाम, नियन्त्रणका लागि सबै स्वास्थ्य संस्था खुल्ला राखी सेवा दिने निर्णय गरेको गाउँपालिका अध्यक्ष दिनेश लामाले जानकारी दिनुभयो ।
पछिल्लो विवरण अनुसार बाढी पहिरोमा परेर रोशी क्षेत्रमा १२ जनाले ज्यान गुमाएका छन् । अधिकाशं घरमा क्षति पुगेको छ । खेतीयोग्य जमिन र बाली नाली नष्ट भएका छन् ।
